Go Klostu Long God
Papa Bilong Ol Pikinini i No Gat Papa
“GOD i save stap long ples bilong em yet, na em i save lukautim ol pikinini, papa bilong ol i dai pinis.” (Song 68:5) Dispela tok bilong Baibel i skulim yumi long wanpela gutpela samting long God Jehova—em i save tingim ol tarangu lain. Lo em i givim long lain Israel i kamapim klia olsem em i tingim tru ol pikinini em papa o mama bilong ol i dai pinis. Orait yumi ken skelim namba wan tok bilong Baibel i stori long “pikinini, papa [bilong em] i dai pinis,” long Kisim Bek 22:22-24.
God i tok: “Yupela i no ken mekim nogut long . . . pikinini, papa [bilong em] i dai pinis.” (Kisim Bek sapta 22 Ves 22) Dispela em i no wanpela tok nating tasol bilong kirapim ol man long mekim pasin sori na helpim pikinini em papa o mama i dai pinis. Nogat. Dispela em wanpela lo God i givim. Ating sampela bai mekim nogut long pikinini em papa bilong em i dai pinis, long wanem, kain pikinini olsem i no gat man bilong lukautim na helpim em. I no stret long wanpela man i “mekim nogut” long kain pikinini olsem. Long sampela Baibel, ol i tanim dispela tok “mekim nogut,” olsem “bagarapim” o “daunim.” Pasin bilong mekim rong long wanpela pikinini i no gat papa, dispela em wanpela bikpela asua long ai bilong God. Olsem wanem em i bikpela asua?
Lo i tok moa: “Sapos yupela i mekim nogut long ol na ol i krai long mi long helpim ol, bai mi harim singaut bilong ol.” (Kisim Bek sapta 22 Ves 23) Dispela tok “yupela,” i makim olsem olgeta wan wan man o wanpela lain olgeta, ol i gat wok long bihainim dispela lo. Jehova i was i stap; em i putim yau long ol pikinini em papa bilong ol i dai pinis, na em i redi long harim singaut bilong ol long kisim helpim.—Song 10:14; Sindaun 23:10, 11.
Orait wanem samting bai kamap sapos wanpela man i rongim wanpela pikinini i no gat papa, na dispela i kirapim pikinini long singaut long God? Jehova i tok: “Bai mi belhat na mi mekim ol birua i kam pait long yupela na kilim yupela i dai.” (Kisim Bek sapta 22 Ves 24) Wanpela buk i stori long ol tok bilong Baibel i stori olsem long tok Hibru, dispela tok “bai mi belhat, i olsem ‘bai nus bilong mi i kamap hot.’ ” Jehova i no larim ol jas bilong Israel long karimaut dispela lo, nogat. God yet bai kotim ol man i daunim ol pikinini em ol i no inap helpim ol yet.—Lo 10:17, 18.
Jehova i no senisim pasin bilong em. (Malakai 3:6) Em i save sori tru long ol pikinini i no gat papa o mama. (Jems 1:27) Tingim dispela samting: Dispela Papa bilong ol pikinini i no gat papa, em i save belhat taim ol man i mekim nogut long ol pikinini i no gat asua. Ol man husat i save mekim nogut long ol pikinini i no gat papa, ol bai i no inap abrusim “belhat bilong Bikpela.” (Sefanaia 2:2) Ol dispela manmeri nogut bai save olsem “sapos God bilong i stap oltaim em i laik mekim save long wanpela man na em i holimpas em, orait dispela man i ken pret nogut tru.”—Hibru 10:31.