Wok Bilong Sanapim Ol Haus Kingdom Long Sampela Kantri Bilong Yurop

¹ Long taim bilong yumi, ol i bin putim sampela tambu long wok bilong ol Witnes Bilong Jehova long sampela kantri bilong Yurop, na long Isten Yurop tu. Planti tambu ol i putim i hatpela tru. I hatwok long mekim ol miting long ples klia, na ol i no gat ol Haus Kingdom bilong mekim ol miting long en. Tasol, nau ‘Bikpela i bin mekim bikpela wok tru bilong helpim yumi. Olsem na yumi belgut tru.’​​—⁠Sng. 126:⁠3.

² Kirap long 1983, ol i lusim pasin bilong bosim strong ol Witnes Bilong Jehova. Long 1989, gavman bilong Polan na Hangari i orait long ol Witnes Bilong Jehova. Long 1991, gavman bilong Rasia i orait long ol Witnes Bilong Jehova. Kirap long dispela taim na i kam, wok i bin kamap gutpela tru long Rasia na long ol kantri em bipo ol i hap bilong Soviet Yunion. Namel long Mas 1996 na Oktoba 1998, Gavening Bodi i bin tok orait long ol brens-ofis i lukautim 11-pela kantri long Yurop long ol i ken kisim dinau bilong sanapim 359 Haus Kingdom.

³ Taim yu lukluk long ol piksa i stap long dispela namel pepa bilong Wok Kingdom, tingim tingim long bel ol bikpela samting Jehova i bin mekim bilong helpim lain bilong em. (Sng. 136:⁠4) Yu bai amamas long save olsem ol i mekim gutpela wok tru long ol kontribiusen bilong ol brata long olgeta hap, na dispela i kamapim klia tok bilong Jisas long Jon 13:35: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”

⁴ Wanpela bilong ol kantri long Yurop we i kisim helpim long wok bilong sanapim ol Haus Kingdom long ol hap i sot long mani samting em Romenia, na long dispela kantri ol i bin sanapim 36 Haus Kingdom kirap long Julai 2000. Long Yukren ol i bihainim wankain stail tasol bilong sanapim klostu olgeta Haus Kingdom, na long yia 2001 ol i sanapim 61 Haus Kingdom, na ol i sanapim 76 Haus Kingdom moa long 2002. Long rot bilong ol kontribiusen yumi putim long bokis Kontribiusen Bilong Wokim Ol Haus Kingdom, ol i bin wokim planti handet Haus Kingdom long Balgeria, Kroesia, Masedonia, Moldova, Rasia, na Serbia na Montenegro.

⁵ Wok bilong sanapim ol Haus Kingdom long sampela kantri i hatwok, na i gat planti samting ol i mas mekim paslain long wok i kirap, na dispela i save kisim bikpela hap taim. Na tu, mani ol i lusim long wokim wanpela Haus Kingdom long dispela hap bilong Yurop i winim tru mani ol i lusim long wokim ol Haus Kingdom long planti hap bilong Afrika na Saut Amerika. Tasol namba bilong ol manmeri i lotuim Jehova i go bikpela tru, olsem na ol i mas wokim yet planti handet Haus Kingdom long ol kantri long Yurop i sot long mani samting!

⁶ Em i gutpela tru long lukim ol i wokim hariap planti Haus Kingdom moa! Planti ekspiriens i kamapim olsem long ol hap ol i wokim ol Haus Kingdom long en, dispela i gutpela rot bilong autim tok long ol man bilong ol dispela hap. Long sampela hap, ol lain bilong gavman samting ol i kirap nogut long gutpela pasin bilong ol Witnes long wok gut wantaim ol na bihainim stret ol lo bilong sanapim ol haus samting.

⁷ Aisaia i bin tok profet long namba bilong ol man i insait long lotu i tru bai kamap bikpela long dispela taim. Long rot bilong dispela profet, God i bin tok: “Mi Bikpela, mi tok, ol dispela samting bai i kamap hariap long taim mi makim pinis.” (Ais. 60:22) Tru tumas, ol samting i kamap insait long ol yia i go pinis i soim klia tru olsem dispela em taim Jehova i bin makim long wok bai kamap bikpela long Isten Yurop. Jehova i ken mekim gut tru long yumi taim yumi mekim ol samting bilong hariapim wok bilong sanapim ol Haus Kingdom long planti hap. Yumi ken mekim olsem long rot bilong putim yet kontribiusen long bokis Kontribiusen Bilong Wokim Ol Haus Kingdom! Dispela bai opim rot long ol i ken sanapim planti Haus Kingdom moa long ol kantri i sot long mani samting. Na dispela bai helpim lotu i tru i kamap bikpela long planti hap bilong Yurop, na wok autim tok bai kamap bikpela long “olgeta hap bilong graun.”​​—⁠Ap. 13:⁠47.

[Ol Piksa long pes 3]

Bikpela Haus i Gat Ol Haus Kingdom Long En Moscow, Rasia

[Ol Piksa long pes 4-6]

Ol Nupela Haus Kingdom Long Isten Yurop

Strumica, Masedonia

Daruvar, Kroesia

Bitola, Masedonia

Sokal, Lviv Distrik, Yukren

Mladost, Balgeria

Krasnooktyabrskiy, Hap Bilong Maykop, Rasia

Bački Petrovac, Serbia na Montenegro

Plovdiv, Balgeria

Tlumach, Ivano-Frankivsk Distrik, Yukren

Rava-Ruska, Lviv Distrik, Yukren

Stara Pazova, Serbia na Montenegro

Zenica, Bosnia na Hetsagovina

Sokal, Lviv Distrik, Yukren

Zhydachiv, Lviv Distrik, Yukren