Tok Bilong God i Tru
1 Man bilong raitim song i tok: “As bilong lo bilong yu em i tok tru tasol.” (Sng. 119:160) Long rot bilong Baibel, Jehova i givim ol gutpela bekim long ol bikpela askim long ol samting long i stap bilong ol man. Em i save mekim gut bel bilong ol man i gat hevi na helpim ol long wetim gutpela samting bai kamap. Na em i soim yumi long rot bilong i go klostu long em. Wanpela meri husat i pilim tok i tru em i tok: “Pasin bilong lainim tok i tru bilong Baibel i kain olsem man i lusim wanpela ples i tudak na i gat planti hevi long en na i go long wanpela naispela rum i gat lait long en.” Olsem wanem? Yu save wok strong long autim tok i tru bilong Baibel long olgeta taim rot i op?
2 Strong Bilong Senisim Man na Ol Man Bilong Olgeta Hap i Laikim: Tok i tru bilong Baibel i gat strong long i go daun tru long bel na senisim i stap bilong ol man. (Hi. 4:12) Wanpela yangpela meri, nem bilong em Rosa, em i bin insait long pasin pamuk, na pasin bilong dring planti na kisim ol drak. Em i tok: “Wanpela taim bel bilong mi i bagarap olgeta na tupela marit Witnes ol i toktok wantaim mi long olsem wanem Baibel inap helpim yumi long stretim ol hevi bilong yumi. Mi kirap stadi long Baibel, na mi laikim tru ol tok mi lainim. Insait long wanpela mun mi kisim strong inap long mi senisim tru pasin bilong mi. Nau i stap bilong mi i gat as bilong en, na mi no dring o kisim drak moa bilong helpim mi. Mi laik tru long kamap pren bilong Jehova, olsem na mi pasim tok strong long bel long mi mas bihainim ol lo bilong em. Mi save, sapos mi no bin kisim gutpela tingting na save long rot bilong Baibel, longtaim yet mi bin kilim i dai skin bilong mi.”—Sng. 119:92.
3 Baibel i narapela kain long planti buk bilong nau, long wanem, ol man bilong ‘olgeta lain man, kantri, skin, na tok ples’ i laik kisim save long tok bilong en. (KTH 7:9) God i laik “kisim bek olgeta manmeri, bai ol i ken save long as bilong tok tru.” (1 Ti. 2:4) Olsem na yumi no ken skelim lain o kantri samting bilong man na ting olsem em i no inap amamas long harim gutnius, nogat. Yumi mas autim tok bilong Kingdom long olgeta man, na yumi mas kamapim tok bilong Baibel taim rot i op long yumi inap mekim olsem.
4 Kamapim Ol Tok Bilong Baibel: I gat planti rot bilong yumi inap mekim wok long Baibel taim yumi autim tok. Taim yu tilim ol nius, kamapim skripsa ol i bin putim wantaim ol tok yumi ken mekim bilong tilim ol nius. Sampela i kisim save olsem taim ol i tilim nius Wok Kingdom i makim bilong tilim na ol i makim wanpela skripsa na ritim long kirap bilong tok, dispela i save kamapim gutpela samting. Taim yu go bek lukim man, kamapim wanpela o tupela skripsa bilong helpim man long kisim yet ol stretpela save. Taim yu lukautim wanpela Baibel-stadi, stori gut long ol skripsa i kamapim ol bikpela tok bilong stadi. Long olgeta taim yu mas karim Baibel wantaim yu na bai yu inap autim tok long kain kain taim na ples taim rot i op.—2 Ti. 2:15.
5 Taim rot i op i gutpela yumi mekim wok long Baibel long wok autim tok, na long dispela rot yumi inap helpim ol narapela long kisim helpim long tok i tru bilong God i save kirapim ol man.—1 Te. 2:13.
[Askim Bilong Stadi]
1. Wanem bikpela tok i stap long Baibel?
2. Olsem wanem Baibel i mekim i stap bilong ol man i kamap gutpela moa?
3. Bilong wanem yumi no ken surik long kamapim tok bilong Baibel long ol man?
4. Olsem wanem yumi inap mekim wok long Baibel taim yumi autim tok?
5. Bilong wanem yumi mas wok strong long mekim wok long Baibel taim yumi autim tok?