Yupela i Mas Kisim Pasin Daun
1 Wanpela yangpela man em i wasman bilong sipsip, em i bilip long Jehova na em i daunim wanpela strongpela man bilong pait. (1 Sml. 17:45-47) Wanpela maniman i stap isi na karim hevi i painim em. (Jop 1:20-22; 2:9, 10) Pikinini bilong God i givim biknem long Papa bilong em olsem Em i as bilong ol tok em i skulim ol man long en. (Jo. 7:15-18; 8:28) Long ol dispela stori, pasin daun i as bilong ol pasin ol dispela tripela man i bin mekim. Olsem tasol, long nau tu yumi mas i gat pasin daun bilong redi long ol samting i kamap.—Kl. 3:12.
2 Long Wok Autim Tok: Long pasin daun, yumi ol wokman Kristen i autim gutnius long olgeta kain man, na yumi no skelim ol long wanem lain, ples, o sindaun ol i kam long en, nogat. (1 Ko. 9:22, 23) Sapos sampela i mekim hatpela pasin o ol i hambak na sakim tok bilong Kingdom, yumi no bekim wankain pasin long ol, nogat. Tasol long pasin daun yumi wok yet long painim ol man i gat gutpela bel. (Mt. 10:11, 14) Yumi no laik kamapim save bilong yumi bambai ol man i ken givim biknem long yumi, nogat. Yumi save olsem tok bilong Baibel i winim tru ol tok yumi inap mekim na em inap tru long pulim tingting bilong ol man. (1 Ko. 2:1-5; Hi. 4:12) Yumi bihainim pasin bilong Jisas, na yumi litimapim nem bilong Jehova long olgeta samting yumi mekim.—Mk. 10:17, 18.
3 Long Kongrigesen: Ol Kristen i mas ‘bihainim pasin bilong daunim ol yet na i stap aninit long ol arapela manmeri bilong God.’ (1 Pi. 5:5) Sapos yumi gat tingting olsem ol narapela i winim yumi, yumi bai painim ol rot bilong mekim wok bilong helpim ol brata bilong yumi, na yumi no inap wetim ol long mekim wok bilong helpim yumi. (Jo. 13:12-17; Fl. 2:3, 4) Yumi no inap kisim tingting olsem yumi winim ol narapela na yumi no inap mekim ol kain wok olsem klinim Haus Kingdom.
4 Pasin daun i save helpim yumi long ‘givim bel long ol narapela na karim hevi ol i givim long yumi,’ na dispela i save strongim pasin bilong bel isi na pasin wanbel insait long kongrigesen. (Ef. 4:1-3) Em i helpim yumi long daun long ol man God i bin makim ol long mekim wok bos. (Hi. 13:17) Em i kirapim yumi long kisim ol tok kaunsel o ol tok bilong stretim yumi. (Sng. 141:5) Na em i save kirapim yumi long bilip long Jehova olsem em bai helpim yumi taim yumi mekim ol wok yumi kisim insait long kongrigesen. (1 Pi. 4:11) Olsem Devit, yumi save olsem God i mekim na ol wok bilong yumi i kamap gutpela, na i no long strong bilong yumi yet.—1 Sml. 17:37.
5 Long Ai Bilong God: Bikpela samting moa, yumi mas ‘daunim laik bilong yumi yet na stap aninit long strongpela han bilong God.’ (1 Pi. 5:6) Sapos i gat sampela hevi yumi mas karim, ating yumi bai gat bikpela laik long ol blesing bilong Kingdom i mas kamap kwik. Tasol long pasin daun yumi stap isi na wetim Jehova long truim ol tok promis bilong em long taim em yet i makim. (Jems 5:7-11) Olsem Jop, em wanpela man i bin i stap gut long God, nambawan bikpela tingting bilong yumi em long ‘litimapim nem bilong Bikpela.’—Jop 1:21.
6 Profet Daniel i bin ‘daunim em yet’ long ai bilong God bilong em, na Jehova i mekim gut long em na em i kisim planti gutpela wok. (Dan. 10:11, 12) I gutpela yumi tu i kisim pasin daun, long wanem, ‘sapos yumi daunim yumi yet na stap aninit long Bikpela, bai yumi gat planti samting na biknem, na bai yumi stap gut.’—Snd. 22:4.