Wanpela Wok God i Sapotim
1 Long nau i no gat planti wokboi bilong God husat i kisim bikpela skul, planti mani kago, o biknem long dispela taim nau yumi stap long en. Long dispela as sampela man i ting wok autim tok bilong yumi i no bikpela samting. (Ais. 53:3) Tasol wok yumi save mekim bilong skulim ol man long Baibel i bin mekim gut bel bilong planti milion manmeri long olgeta hap na i givim ol gutpela samting bilong bilip na wet long en. Olsem wanem ol man nating i bin mekim kain gutpela wok olsem? God i save sapotim ol. (Mt. 28:19, 20; Ap. 1:8) Aposel Pol i tok: “Ol man ol arapela i save lukim olsem man i no gat strong, em God i bin kisim bilong semim ol man i gat strong.”—1 Ko. 1:26-29.
2 Ol aposel na ol narapela Kristen long taim bilong ol aposel, klostu olgeta em ol man ‘i no bin skul na ol i man nating tasol.’ (Ap. 4:13) Tasol ol i bin wok strong na ol i no pret long autim gutnius, na Jehova i blesim wok bilong ol. Maski i gat hevi na pasin birua, ‘tok bilong Bikpela i wok strong na i kamap strong.’ I no gat wanpela samting inap pasim dispela wok, long wanem, God i sapotim. (Ap. 5:38, 39; 19:20) I wankain long taim bilong yumi. Gutnius i win na i go bikpela, maski ol strongpela hetman bilong ol gavman i birua long dispela wok.—Ais. 54:17.
3 Givim Biknem Long God: Yu ting i gat as na yumi ken litimapim nem bilong yumi yet, long wanem, yumi stap wokman bilong God? Nogat. Pol i stori long wok bilong ol Kristen long autim tok, na em i tok: “Dispela gutpela samting tru . . . i stap insait long ol samting nating i no gat strong, olsem ol gutpela mani samting i stap insait long ol sospen graun. Em bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.” (2 Ko. 4:7) Pol i luksave olsem long strong bilong God tasol em inap mekim dispela wok autim tok.—Ef. 6:19, 20; Fl. 4:13.
4 Yumi tu i luksave olsem “God i bin helpim” yumi na long dispela as tasol yumi mekim dispela wok bilong autim tok. (Ap. 26:22) Long rot bilong autim tok long olgeta hap bilong graun, Jehova i mekim wanpela strongpela wok long yumi bilong seksekim ol kantri—wanpela mak bilong kot na bagarap klostu bai kamap. (Hag. 2:7, NW ) Yumi kisim wanpela gutpela wok taim yumi stap “wanwok bilong God” long dispela bikpela wok bilong bungim kaikai bilong gaden spirit!—1 Ko. 3:6-9.