Musik i Givim Nupela Strong
1 Singsing na musik ol i bikpela hap bilong lotu tru. Long Israel bilong bipo, Asap na ol brata bilong em i singsing olsem: “Singaut long [Bikpela] na tok tenkyu long em. . . . Yumi singim ol song bilong amamas long em na bilong litimapim nem bilong em. Na yumi tokaut long ol gutpela gutpela samting em i bin mekim.” (1 Sto. 16:8, 9) Long nau yumi save singsing long Jehova long ol miting bilong yumi long kongrigesen. (Ef. 5:19) Em wanpela gutpela rot tru bilong litimapim nem bilong em!—Sng. 69:30.
2 Taim yumi putim yau long Kingdom Melodies, em musik bilong ol singsing bilong Kingdom em lain bilong pilai musik i mekim, ol samting bilong spirit bai pulap long tingting bilong yumi. Wanpela sista i tok: “Taim mi harim musik, mi save kirap tingim ol tok bilong en. Em wanpela gutpela rot tru bilong tingim Jehova taim mi amamas long harim musik!”—Fl. 4:8.
3 Ol Ples We Yu Ken Amamas Long Harim: Pasin bilong pilaim ol Kingdom Melodies long haus bai helpim olgeta long tingim ol samting bilong spirit na strongim pasin wanbel insait long famili. Wanpela famili i tok: “Mipela i save pilaim dispela musik olgeta taim long haus na ka na mipela i no save les long harim. Planti taim Kingdom Melodies i save mekim tingting bilong mipela i stap isi taim mipela i redi long i go long ol miting Kristen o taim mipela i redi long i go long kibung. Wanpela sista i tok: “Taim mi harim ol [Kingdom Melodies] long taim mi mekim wok bilong haus, dispela i save mekim mi amamas moa yet—i no gat wanpela bai ting mi bai amamas olsem taim mi wok long stretim klos mi wasim? Mi bai pilaim dispela musik taim mi pilim bel hevi. Em i save givim nupela strong long mi! . . . Olgeta wan wan singsing i save kirapim mi long amamas.” Yu ting i gat sampela taim we dispela musik i ken helpim yu?
4 Klostu olgeta musik long nau i kamapim tingting bilong dispela graun. Ol papamama i ken kirapim ol pikinini long laikim gutpela musik long rot bilong mekim gutpela wok long ol Kingdom Melodies. Planti man yumi stadi wantaim ol na ol man i gat laik long save long tok i tru, ol bai amamas long save long ol dispela gutpela singsing, em ol dispela singsing i litimapim nem bilong Jehova na i save mekim man i amamas.—Sng. 47:1, 2, 6, 7.