Bikpela Wok Bilong Tilim Nupela Buklet
1 Planti manmeri long nau ol i tingting planti long ol hevi bilong graun i wok long go bikpela. Tasol wan wan tasol ol i save long as na ol hevi i stap, na wanem samting bai kamap bihain na ol i mas mekim wanem samting bilong abrusim bagarap klostu nau bai kamap. (Ese. 9:4) Bilong helpim ol man long luksave long taim yumi stap long en, wanpela bikpela wok bilong tilim nupela buklet Was i Stap! bai kirap long Sande, Februeri 13 i go Sarere, Mas 12.
2 Yupela i ken tilim dispela buklet taim yupela i autim tok long ol haus, o mekim ol gobek, o autim tok long kain kain taim na ples, o autim tok long rot o long ol bisnis teritori. Tasol yupela i no ken givim long olgeta man, nogat. Yupela mas givim tasol long ol man husat i soim olsem ol i gat laik long save moa long ol tok Baibel i mekim long ol samting i wok long kamap long nau. Yupela i ken givim ol liklik nius long ol lain i no gat bikpela laik long harim tok.
3 Yu inap kirapim laik bilong ol man long rot bilong mekim tok olsem:
◼ “Planti manmeri i tingting planti long ol bikpela hevi na ol samting nogut tru i save kamap long nau. [Stori long wanpela hevi em ol man long hap bilong yu i save long en.] Yu bin save olsem Baibel i tok profet long ol dispela samting bai kamap? [Larim man i bekim tok. Orait ritim wanpela skripsa i stret long hevi yu bin stori long en, kain olsem Matyu 24:3, 7, 8; Luk 21:7, 10, 11; 2 Timoti 3:1-5.] Baibel i stori long as na ol hevi i stap nau na wanem samting bai painim ol man long bihain. Yu laik kisim sampela save moa? [Larim man i bekim tok. Tilim buklet long em sapos yu lukim olsem em i gat bikpela laik long save moa.] Yu ken kisim dispela buklet i no gat pe bilong en. Tasol sapos yu laik givim kontribiusen bilong helpim wok bilong mipela long olgeta hap, bai mipela i amamas long kisim.”
4 O ating yu ken tok olsem:
◼ “Planti manmeri long nau ol i bel hevi long ol samting nogut tru i wok long kamap o long wanpela bikpela hevi i painim ol. Sampela i ting bilong wanem God i no mekim sampela samting na bai ol kain samting olsem i no ken kamap. Baibel i tokim yumi olsem klostu nau God bai mekim ol samting bilong pinisim olgeta hevi bilong ol man. Lukim ol gutpela samting God bai mekim long ol man. [Ritim Song 37:10, 11.] Yu laik kisim sampela save moa long ol dispela samting?” Mekim pinis bilong tok olsem i stap antap.
5 Wok strong long kisim nem na atres bilong olgeta wan wan man i kisim buklet, na stretim rot bilong i go bek lukim ol na kirapim laik bilong ol long harim tok. Ol tok bilong helpim yu long mekim olsem bai kamap long Wok Kingdom bilong Februeri 2005. Sapos man bilong haus i soim olsem em i gat laik long harim tok taim yu bungim em namba wan taim, orait yu ken kirapim stadi wantaim em long rot bilong buklet Was i Stap!, o narapela buk na nius samting olsem buklet Yumi Mas Mekim Wanem?
6 Bai yupela inap long kisim dispela nupela buklet bihain long dispela tok i kamap long Miting Bilong Wok. I gutpela ol pablisa na painia i kisim tasol hamas buklet ol i ting ol bai tilim long kirap bilong dispela bikpela wok. Jehova bai blesim dispela bikpela wok bilong litimapim nem bilong em na bilong helpim ol man i gat gutpela bel long olgeta hap.—Sng. 90:17.