Namba 4 Hap—Mekim Ol Baibel Stadi i Save Helpim Ol Man
Lainim Ol Sumatin Long Redim Stadi
1 Sumatin bai kamap strong kwiktaim sapos em i ritim, makim ol bekim, na tingim olsem wanem em inap kamapim ol dispela tok long toktok bilong em yet. Olsem na taim yupela i kirap stadi, yu ken redim wanpela sapta wantaim em bilong soim em long pasin bilong redim stadi. Long planti sumatin, i gutpela long redim wanpela sapta olgeta wantaim ol, dispela bai helpim sumatin.
2 Makim Ol Bekim na Raitim Sampela Liklik Tok: Stori long rot bilong painim ol tok i bekim stret ol askim bilong stadi. Soim sumatin buk bilong yu em yu bin makim tasol ol bikpela tok. Taim yupela i redim stadi, ating em bai bihainim pasin bilong yu long makim tasol ol tok bilong helpim em long tingim gen ol bekim. (Lu. 6:40) Orait askim em long bekim askim long toktok bilong em yet. Long dispela rot bai yu inap save em i bin kisimgut tok bilong stadi o nogat.
3 Pasin bilong lukim ol skripsa em buk i no kamapim tok bilong ol em i bikpela samting taim sumatin i redim stadi bilong em. (Ap. 17:11) Helpim em long kisim save olsem ol skripsa em buk i no kamapim ol tok bilong en i helpim wanpela tok bilong paragraf. Soim em long pasin bilong raitim sampela liklik tok arere long pes bilong buk. Kamapim klia long em olsem Baibel i as bilong ol samting em i wok long lainim. Kirapim em long kamapim tok bilong ol skripsa em buk i no kamapim ol tok bilong en long ol bekim bilong em yet long taim bilong stadi.
4 Skelim Ol Bikpela Tok na Riviu: Paslain long sumatin i kirap redim stadi, i gutpela em i kisim save long stadi i toktok long wanem samting. Tokim em long skelim ol samting em bai stadi long en long rot bilong lukim het tok bilong sapta na ol liklik het tok na ol piksa. Stori long em olsem paslain long em i pinis long redim stadi bilong em, i gutpela em i lusim liklik haptaim long mekim riviu long ol bikpela tok bilong stadi, ating em i ken mekim wok long blok bilong riviu sapos buk i gat dispela blok. Kain pasin olsem bai helpim em long tingim tok bilong stadi.
5 Taim yu skulim gut sumatin long pasin bilong redim gut stadi bilong em, dispela bai helpim em long redim ol tok bilong miting na long bekim sampela tok. Na tu dispela bai helpim em long kisim pasin bilong mekim stadi bilong em yet taim i no gat man i stadi moa wantaim em.
[Rait long pes 1]
3,579 pablisa long Ogas—Winim olgeta mun bipo!
Namba bilong ol manmeri i kam long 2004 Memorial—19,539!
Namba bilong ol pablisa i go antap 1% long 2004 sevis yia!