Namba 2 Hap—Mekim Ol Baibel Stadi i Save Helpim Ol Man
Redi Long Mekim Stadi
1 Bilong mekim gut Baibel stadi, i no olsem yumi mas stori long ol paragraf na lukim ol skripsa ol i no kamapim tok bilong en na em tasol, nogat. Yumi mas kamapim gut ol tok long pasin i kirapim bel bilong sumatin. Dispela i makim olsem yu mas tingim sumatin taim yu redim stadi.—Snd. 15:28.
2 Pasin Bilong Redim Stadi: Pastaim, beten long Jehova long sumatin na ol samting bilong helpim em. Askim Jehova long helpim yu long putim tok i go daun long bel bilong sumatin. (Kl. 1:9, 10) Bilong kliagut long stadi i toktok long wanem samting, lusim liklik haptaim long skelim het tok bilong sapta, ol liklik het tok na ol piksa samting. Askim yu yet, ‘Wanem bikpela tok bilong stadi?’ Dispela bai helpim yu long kamapim gut ol bikpela tok taim yu mekim stadi.
3 Orait redim ol wan wan paragraf. Painim ol bekim bilong ol askim, na yu mas makim ol bikpela tok tasol. Skelim olsem wanem ol skripsa ol i no kamapim tok bilong ol long paragraf i helpim bikpela tok bilong paragraf na makim ol skripsa yu bai ritim long taim bilong stadi. I gutpela yu ken raitim sampela tok bilong skripsa long arere bilong paragraf. Sumatin i mas save olsem samting em i lainim i kam long Baibel.—1 Te. 2:13.
4 Redim Stadi i Helpim Sumatin: Skelim stadi na tingim ol samting bilong helpim sumatin. Traim long tingim wanem ol askim em bai kamapim na wanem ol tok em bai i no inap kisimgut o em i no inap bilip long en. Askim yu yet: ‘Em i mas kliagut long wanem ol samting o em i mas kamap gutpela moa long en na bai em inap kamap strong long ol samting bilong spirit? Olsem wanem mi inap putim tok i go daun long bel bilong em?’ Orait nau kamapim ol samting i stret long sumatin. Sampela taim, yu mas mekim tok piksa, kamapim klia wanpela tok, o kamapim sampela askim bilong helpim sumatin long kliagut long insait bilong wanpela tok o skripsa. (Neh. 8:8) No ken kamapim ol tok i no inap helpim bikpela tok bilong stadi. Mekim sotpela riviu long pinis bilong stadi, dispela bai helpim em long tingim ol bikpela tok bilong stadi.
5 Yumi save amamas tru taim ol nupela man i kamapim ol gutpela stretpela pasin i save litimapim nem bilong Jehova! (Fl. 1:11) Bilong helpim ol long winim dispela mak, yu mas redim gut stadi long olgeta taim.