Mas, Epril, na Me—Taim Bilong Mekim Bikpela Wok Moa Bilong Autim Tok
1 Long ol de we ol i makim insait long yia, ol Israel i save mekim “ol bikpela de bilong lotu” long Jehova. (Wkp. 23:2) Taim ol i lusim haptaim bilong tingim gutpela pasin bilong God bilong ol, dispela i mekim na ol i kisim amamas na i kirapim ol long givim bel long lotu i tru.—2 Sto. 30:21–31:2.
2 Long nau, wok bilong yumi long autim tok i save go bikpela long olgeta yia long mun Mas, Epril na Me. Em taim bilong yumi long tingim tru long bel wanpela presen i gutpela tru Jehova i bin givim bilong helpim yumi—em Pikinini bilong em. (Jo. 3:16; 1 Pi. 1:18, 19) Taim yumi tingim tingim long bel bikpela pasin laikim God na Pikinini bilong em i bin kamapim, dispela i kirapim yumi long givim biknem long Jehova na long wok strong long mekim laik bilong em.—2 Ko. 5:14, 15.
3 Long dispela yia bai yumi mekim Kaikai Bilong Bikpela long Fonde, Mas 24, long taim san i go daun. Olsem wanem yumi ken mekim bikpela wok moa bilong autim tok long mun Mas, Epril na Me?
4 Autim Tok Long Planti Man Moa: Painim rot bilong toktok wantaim planti man taim yu autim tok. Yu inap long autim tok long ol haus long taim we planti man i stap long haus, olsem long apinun tru? Long kain taim olsem ol man i pinis long wok skin, o long maket, o long gaden. Sampela taim paslain long Buk Stadi, wasman bilong Buk Stadi i ken stretim rot bilong grup bilong em i ken bung bilong autim tok long wanpela teritori klostu. Yupela i ken stretim rot bilong autim tok long taim i stret long ol man long teritori bilong yupela.
5 Narapela rot bilong autim tok long planti man moa em long rot bilong autim tok long ol pablik ples. Wanpela sista long Japan i laik mekim wok painia haptaim maski em i mekim wok skin fultaim. Wanpela elda i tokim em olsem long olgeta de paslain long em i go long wok, em i ken autim tok klostu long ples bilong kisim tren. Em i daunim pasin bilong em yet long sem na winim hevi bilong ol man i save i go i kam long tren na tok bilas long em, na em i kirapim wanpela magasin raun we em i save givim magasin long 40 man, em ol man i save i go i kam long tren, ol wokman bilong ples bilong kisim tren, na ol papa bilong ol stua i stap klostu long dispela hap. Em i tilim 235 magasin long olgeta wan wan mun. Long rot bilong toktok wantaim ol man long wanpela skripsa bilong Baibel inap sampela minit long olgeta de, em i kirapim 6-pela Baibel stadi.
6 Kain Kain Rot Bilong Autim Tok: Planti pablisa i stap long skul yet i gat skul holide insait long yia. Ol dispela haptaim i gutpela taim bilong insait long wok painia haptaim. Na tu, ol yangpela Kristen inap mekim bikpela wok moa long rot bilong autim tok long skul. Yu bai kirap nogut long kisim save olsem ol wanklas bilong yu ol i gat laik long save long ol bilip bilong yu. Taim yu mas stori long sampela samting o raitim stori bilong sampela samting long skul, i gutpela yu mekim wok long en bilong autim tok. Ol narapela i bin mekim olsem long rot bilong ol vidio bilong yumi. Sampela i bin stadi wantaim ol wanklas bilong ol na helpim ol long kamap strong na dediket na kisim baptais. Em ol gutpela rot bilong “litimapim nem bilong” Jehova.—Sng. 148:12, 13.
7 Long ol samting yu save mekim long olgeta de, wok long painim rot bilong toktok wantaim ol man long gutpela God bilong yumi na ol gutpela tok promis bilong em. Wanpela brata em i save go i kam long wankain tren long olgeta de i save autim tok long ol man long tren long taim i stret long mekim. Olsem, taim em i wet long ples bilong kisim tren, em i save autim tok long wanpela yangpela man insait long 5-pela minit long olgeta de. Dispela i mekim na dispela yangpela man na wanpela pren bilong em i orait long stadi long Baibel. Ol i stadi long Baibel long tren taim ol i go. Bihain liklik, wanpela lapun meri em i bin harim toktok bilong ol i go long brata na askim brata long em tu i laik stadi long Baibel. Em tu i save amamas long stadi long Baibel long ol de we em i raun long tren. Long dispela rot, dispela brata i bin stadi wantaim 10-pela narapela narapela man long tren.
8 Tasol olsem wanem sapos yu no inap mekim bikpela wok tumas, long wanem, yu lapun o yu gat sik? I gat rot i stap yet we yu ken mekim bikpela wok moa bilong givim biknem long Jehova. Ating yu ken autim tok long ol narapela long rot bilong telefon o long rot bilong pas. Na tu, yu ken autim tok long “ol wantok” o ol narapela man i kam long haus bilong yu.
9 Taim ol nupela man i kam long Memorial dispela inap kirapim laik bilong ol long litimapim nem bilong Jehova moa yet. Yu inap helpim ol long daunim pasin bilong pret long autim tok long rot bilong kamapim sampela gutpela ekspiriens yu bin kisim long autim tok na wok long skulim ol long kamapim insait bilong ol tok bilong Baibel na sambai long bilip bilong ol. (1 Pi. 3:15) Sapos wanpela Baibel sumatin i laik autim tok, orait toktok wantaim wasman siaman. Em bai stretim rot bilong bung wantaim sumatin na skelim olsem sumatin i winim ol mak pinis bilong bung wantaim kongrigesen long autim tok o nogat. Jehova i save amamas tru long lukim ol nupela i sapotim em olsem King bilong heven na graun!—Snd. 27:11.
10 Yu Inap Mekim Wok Painia Haptaim? Yu mas skelim gut 50 aua em painia haptaim i mas kisim. (Mt. 5:37) Dispela i makim olsem yu mas lusim olsem 12 aua long autim tok long olgeta wan wan wik. Olsem wanem? Wanpela bilong ol sediul i stap long pes 5 i stret long yu? Sapos nogat, yu inap long bihainim wanpela sediul em bai helpim yu long mekim wok painia haptaim long Mas, o Epril, o Me? Askim Jehova long helpim yu long mekim bikpela wok moa bilong autim tok.—Snd. 16:3.
11 Ol elda na ol kongrigesen sevan bai helpim wok yu mekim long taim bilong Memorial bilong litimapim nem bilong Jehova. Ating planti bilong ol bai mekim wok painia haptaim. Ol elda bai stretim rot bilong mekim sampela bung moa bilong autim tok long ol apinun na long Sarere Sande. Bilong save long wanem hap na taim ol bai mekim ol bung bilong autim tok na husat bai lukautim grup, ol elda i mas toktok wantaim ol bratasista i pasim tok pinis long mekim wok painia o ol i tingting long mekim wok painia. Ol elda bai stretim ol samting bambai i gat ol narapela pablisa tu i kam bilong autim tok long ol de na taim yu makim bilong autim tok. Long dispela rot, ol samting bai wok stret na gutpela samting i ken kamap.—Snd. 20:18.
12 Yu Mas Wok Strong: Sapos ol samting long sindaun bilong yu i mekim na yu no inap mekim wok painia haptaim, tingim, Jehova i save amamas long ‘ol samting ol wan wan man ol inap givim, na em i no save ting long ol samting man i no gat, na em i skelim pasin bilong en.’ (2 Ko. 8:12) I gat planti samting yumi mas tenkyu long Jehova long en. Olsem na i gat as na Devit i tok: “Bai mi tenkyu long God. Oltaim bai mi litimapim nem bilong en.” (Sng. 34:1) Bai yumi amamas long wok strong long mekim olsem long dispela taim bilong Memorial.
[Askim Bilong Stadi]
1. Pasin bilong tingim “ol bikpela de bilong lotu” i mekim wanem long ol Israel i save daun long God?
2, 3. Bilong wanem i stret yumi mekim bikpela wok moa bilong autim tok long Mas, Epril na Me? Bai yumi mekim Memorial long wanem taim?
4, 5. (a) Wanem samting i helpim sampela long autim tok long planti man moa? (b) Wanem ol narapela rot yu lukim olsem i wok gut long hap bilong yu?
6. Olsem wanem ol yangpela i ken mekim bikpela wok moa bilong autim tok?
7. (a) Wanpela brata i mekim wanem bilong autim tok long ol narapela? (b) Wankain samting i bin painim yu?
8. Wanem ol rot i stap em ol lain i lapun o i gat sik i ken mekim wok long en bilong mekim bikpela wok moa bilong autim tok?
9. Olsem wanem yumi ken helpim ol Baibel sumatin long winim ol mak bambai ol i ken bung wantaim kongrigesen long autim tok?
10. (a) Olsem wanem wanpela gutpela sediul inap helpim yumi long mekim wok painia haptaim? (b) Yu bin mekim wok painia haptaim las yia long mun Mas, o Epril, o Me? Yu bin mekim olsem wanem?
11. Olsem wanem ol elda na ol kongrigesen sevan i ken helpim ol lain bai insait long wok painia haptaim?
12. Wanem samting i save kirapim yumi long givim biknem long Jehova long olgeta taim?
[Blok long pes 3]
Olsem Wanem Yu Ken Mekim Bikpela Wok Moa?
◼ Autim tok long taim ol man i stap long haus
◼ Autim tok long ol pablik ples
◼ Autim tok long ples wok o skul
◼ Mekim wok painia haptaim
[Sat long pes 5]
Ol Sediul Bilong Mekim Wok Painia Haptaim—Ol Sediul Bilong Winim 12-pela Aua Long Autim Tok Long Olgeta Wik
Ol Moning—Mande i Go Sarere
Yu ken makim Sande olsem senis bilong narapela de.
De Taim Ol Aua
Mande Moning 2
Tunde Moning 2
Trinde Moning 2
Fonde Moning 2
Fraide Moning 2
Sarere Moning 2
Olgeta Aua: 12
Tupela De Olgeta
Yu ken makim tupela de namel long wik long laik bilong yu yet.
(Wanem tupela de yu makim, aua long dispela sediul bai inap olsem 48 insait long wanpela mun.)
De Taim Ol Aua
Trinde De Olgeta 6
Sarere De Olgeta 6
Olgeta Aua: 12
Tupela Apinun na Sarere Sande
Yu ken makim tupela apinun namel long wik.
De Taim Ol Aua
Mande Apinun 1 1/2
Trinde Apinun 1 1/2
Sarere De Olgeta 6
Sande Hap De 3
Olgeta Aua: 12
Tripela Apinun na Ol Sarere
Yu ken makim Sande olsem senis bilong narapela de.
De Taim Ol Aua
Mande Apinun 2
Trinde Apinun 2
Fraide Apinun 2
Sarere De Olgeta 6
Olgeta Aua: 12
Sediul Bilong Mi Yet Long Autim Tok
Makim hamas aua yu bai mekim long moning o long apinun.
De Taim Ol Aua
Mande
Tunde
Trinde
Fonde
Fraide
Sarere
Sande
Olgeta Aua: 12