Sediul Bilong Famili—Autim Tok
1 Jehova i amamas long lukim ol yangpela i litimapim nem bilong em. (Sng. 148:12, 13) Long taim bilong Jisas “ol liklik pikinini” tu i ‘litimapim nem bilong God.’ (Mt. 21:15, 16) Long nau tu ol i mekim olsem. Yupela ol papamama, olsem wanem yupela inap helpim ol pikinini long kamap man na meri i save litimapim nem bilong Jehova long taim bilong autim tok? Olsem stori long ol miting bilong kongrigesen i kamapim, wanpela bikpela samting em pasin bilong yupela. Wanpela papa i kamapim tingting bilong planti papamama taim em i tok: “Ol pikinini i no save bihainim ol tok yu mekim, nogat, ol bai bihainim ol samting yu yet i save mekim!”
2 Wanpela sista, em papamama i save aninit long God i bin mekim bikpela long em, em i tok: “I no gat wanpela taim mipela i kirap long Sarere moning na mipela i askim papamama olsem mipela bai go autim tok o nogat. Mipela i save mipela bai go.” Na olsem tasol, long rot bilong autim tok wantaim famili long olgeta wik, yu tu inap helpim ol pikinini long pilim tru olsem wok bilong autim tok i bikpela samting. Taim ol pikinini i lukim yu i autim tok, dispela bai opim rot long ol i kisim save long pasin bilong autim tok, na tu, yu inap long skelim pasin, toktok, na save bilong ol long autim tok.
3 Lainim Pikinini: Bilong ol pikinini i ken amamas long autim tok, ol i mas redi gut pastaim bambai ol i ken autim gut tok. Dispela sista pastaim yumi stori long em, em i tok tu olsem: “Mipela i no bihainim nating papamama olsem em wok bilong ol tasol, nogat. Mipela i save olsem mipela tu i mas mekim sampela wok, maski em bilong paitim belo bilong dua o givim liklik nius long man bilong haus. Mipela i redi gut paslain long autim tok long Sarere Sande, olsem na mipela i save long ol tok mipela bai mekim.” Yu inap lainim ol pikinini bilong yu long rot bilong lusim sampela minit long olgeta wik bilong redim ol long autim tok, na yu ken mekim olsem long taim bilong famili stadi o long narapela taim.
4 Taim famili olgeta i autim tok wantaim, dispela bai opim rot bilong yu long putim tok i tru long bel bilong ol pikinini bilong yu. Wanpela papa Kristen i bin kisim pikinini meri bilong em i go wantaim em taim em i bin wokabaut inap 10 kilomita i go na 10 kilomita i kam bilong tilim ol liklik nius long ol man. Dispela pikinini meri i tok: “Taim mitupela i wokabaut wantaim, papa i bin wok long putim tok i tru i go daun long bel bilong mi.” (Lo 6:7) Yu tu bai kisim gutpela blesing sapos yu putim wok bilong autim tok olsem samting famili i save mekim long olgeta wik.
This article is repeated again in km 8/09