Wok Long Strongim Ol Wanbilip
1 Aposel Pol i mekim olgeta samting em inap mekim bilong strongim ol wanbilip bilong em. (Ap. 14:19-22) Olsem tasol, yumi tu i tingim ol brata bilong yumi taim hevi i painim ol, na yumi laik helpim ol. Baibel i tok yumi olgeta i mas tingim ol brata, i no ol elda tasol i mas tingim ol, nogat. (Ro. 15:1, 2) I gat tupela samting yumi ken mekim bilong bihainim dispela tok: “Yupela wan wan i mas givim gutpela tok long ol arapela manmeri bilong God na strongim bel bilong ol.”—1 Te. 5:11.
2 Luksave Long Ol Samting Ol Narapela i Sot Long En: Baibel i tok Dorkas i “save mekim ol gutpela pasin na em i save helpim ol manmeri i sot long ol samting.” (Ap. 9:36, 39) Em i luksave long ol lain i sot long ol samting na em i mekim ol samting bilong helpim ol. Em i stap gutpela piksa long yumi ken bihainim! Ating yu luksave olsem wanpela lapun brata o sista i no gat rot bilong i kam long miting. O wanpela painia i no gat wanpela bilong wok wantaim em long wanpela apinun namel long wik. Sapos yu luksave long kain samting olsem na yu helpim ol, dispela bai strongim tru ol.
3 Toktok Long Ol Samting Bilong Spirit: Yumi inap strongim ol narapela tu long rot bilong toktok bilong yumi. (Ef. 4:29) Wanpela elda i tok: “Sapos yu laik strongim narapela, orait toktok wantaim em long ol samting bilong spirit. Bilong kirapim kain tok olsem, yu ken mekim askim olsem, ‘Yu bin kisim tok i tru olsem wanem?’ ” Yumi mas tingim ol yangpela insait long kongrigesen, na ol bratasista i bel hevi o i save sem. (Snd. 12:25) No ken larim pasin bilong stori long ol amamas bilong dispela graun i mekim na yu no gat taim bilong toktok wantaim ol wanbilip long ol samting bilong spirit.—Ro. 1:11, 12.
4 Orait yu ken toktok long wanem ol samting bilong strongim ol narapela? Taim yu ritim Baibel na mekim stadi bilong yu yet, yu bin painim wanpela stiatok i kirapim yu long laikim moa yet Jehova na amamas long em? O i gat wanpela gutpela tok yu bin harim long pablik tok o long Stadi Wastaua na dispela i bin strongim bel bilong yu? O yu ritim stori bilong wanpela gutpela ekspiriens na dispela i bin strongim bilip bilong yu? Sapos yu putim ol kain gutpela tok olsem long bel na tingting bilong yu, oltaim bai yu inap kamapim gutpela tok bilong strongim ol narapela.—Snd. 2:1; Lu. 6:45.
5 Long rot bilong helpim ol wanbilip bilong yumi na mekim gutpela wok long maus, yumi inap long strongim ol.—Snd. 12:18.