Mekim Gutpela Pasin na Helpim Ol Narapela
1 Dorkas “i save mekim ol gutpela pasin na em i save helpim ol manmeri i sot long ol samting.” (Ap. 9:36, 39) Pasin bilong em long mekim gut long ol narapela i mekim na ol lain i save long em na God Jehova i laikim em. Hibru 13:16 i tok: “Yupela i mas mekim gutpela pasin long ol manmeri. Na sapos sampela i sot long ol samting, orait yupela i mas givim sampela samting bilong yupela bilong helpim ol. Yupela i no ken lusim tingting long mekim ol dispela kain pasin, long wanem, em dispela kain ofa God i save laikim tru.” Olsem wanem yumi ken mekim gutpela pasin na helpim ol narapela long nau?
2 Wanpela rot we yumi ken helpim ol narapela em long rot bilong “givim planti samting” long ol. (1 Ti. 6:18) Ol kontribiusen yumi save givim bilong helpim wok long olgeta hap i helpim ol long wokim ol Haus Kingdom, Haus Kibung, na ol brens ofis long olgeta hap bilong graun. Gutpela pasin bilong yumi long givim samting i mekim na planti milion manmeri i kisim helpim long tok bilong God na taim ol i bung wantaim ol narapela ol i kisim strong long ol samting bilong spirit.
3 Givim Gutpela Tok na Helpim Ol: Taim wanpela bikpela bagarap i kamap, ol lain bilong Jehova i redi long “mekim gutpela pasin” long ol wanbilip bilong ol na ol man i no gat wankain bilip olsem ol. (Ga. 6:10) Bihain long taim wanpela faktori bilong wokim ol kemikal long Frans i pairap, tupela marit i save sindaun klostu long dispela faktori i tok: “Ol brata Kristen i kam kwiktaim na helpim mipela long klinim flet bilong mipela na bilong ol neiba bilong mipela tu. Ol neiba bilong mipela i kirap nogut long lukim olsem planti lain i kam bilong helpim mipela.” Narapela sista i tok: “Ol elda i kam helpim mipela na strongim mipela. Em dispela samting mipela i mas kisim, winim ol samting bilong skin.”
4 Tru i gat planti rot we yumi ken mekim gutpela pasin long ol neiba bilong yumi, tasol namba wan rot we yumi ken helpim ol long en em long tokim ol long tok i tru, na helpim “ol long bilip strong na wetim God i givim laip bilong i stap oltaim long ol,” em samting Jehova i bin tok promis long en. (Ta. 1:1, 2) Tok bilong Baibel i mekim gut bel bilong ol man i bel hevi long ol pasin nogut na long ol i gat sin. (Mt. 5:4) Yumi mas mekim gutpela pasin long ol arapela na helpim ol taim yumi inap mekim olsem.—Snd. 3:27.