Wanpela Skul Em Inap Helpim Man Long Kisim Laip
1 Yumi amamas long lukim pes bilong ol man i lait taim ol i kisim save long tok i tru bilong Baibel! Em i gutpela samting long lainim ol narapela long God na ol samting em bai mekim. Kain skul olsem inap helpim man long kisim laip oltaim.—Jo. 17:3.
2 Dispela Skul i Winim Ol Narapela Skul: Long nau ol man inap kisim skul long kain kain rot na ol inap kisim save long olgeta kain samting. (Sav. 12:12) Tasol ol kain save olsem i samting nating taim yumi skelim wantaim “ol strongpela wok bilong God.” (Ap. 2:11) Olsem wanem? Skul bilong dispela graun i helpim ol man long go klostu long Man Bilong Wokim yumi na kisim save long ol samting em bai mekim? Dispela skul i helpim ol man long kliagut long samting i save kamap taim yumi dai o bilong wanem i gat planti pen na hevi? Em i helpim ol man long wetim gutpela samting bai kamap bihain? Em i helpim ol famili long mekim i stap bilong ol i kamap gutpela? Nogat. Wanpela rot tasol bilong yumi ken kisim ol gutpela bekim long ol bikpela askim long i stap bilong yumi, em long kisim dispela skul i kam long God.
3 Skul i kam long God i helpim man long kisim samting em dispela graun i sot tru long en—stretpela pasin. Ol man i harim tok bilong God na bihainim, dispela bai helpim ol long rausim pasin bilong birua long man bilong narapela skin, na pasin bilong litimapim lain na kantri. (Hi. 4:12) Em i kirapim ol man long lusim olgeta kain pasin bilong pait na bagarapim man, na em i helpim ol long ‘kamap ol nupela man.’ (Kl. 3:9-11; Mai. 4:1-3) Na tu, skul i kam long God i bin helpim planti milion man long lusim ol pasin ol i bin hatwok long lusim na ol pasin God i no amamas long en.—1 Ko. 6:9-11.
4 Em i Bikpela Samting Long Nau: Nambawan Bikpela Tisa bilong yumi i tokim yumi long as bilong ol samting i kamap long taim bilong yumi. Ol tok profet bilong em i gat ol strongpela tok em yumi mas autim long olgeta hap. (KTH 14:6, 7) Krais i mekim wok king long heven, na klostu nau bai olgeta lotu giaman i kisim bagarap, na Kingdom Bilong God i redi long bagarapim olgeta gavman bilong graun. (Dan. 2:44; KTH 11:15; 17:16) Olsem na em i bikpela samting long ol man i mas luksave long dispela man em God i makim, nau em i stap King, na ol i mas lusim Bikpela Babilon, na bilip na singaut long nem bilong Jehova. (Sng. 2:11, 12; Ro. 10:13; KTH 18:4) I gutpela yumi wok strong inap long skel bilong yumi long tokim ol narapela long dispela skul em inap helpim ol long kisim laip oltaim.