Wanpela Skul i Helpim Yumi Long Mekim Wok Long Ol Samting Yumi Lainim
1 Taim yumi skelim ol tok i stap long Sediul Bilong Skul Tiokratik Bilong Autim Tok Bilong 2006, yumi wok strong long bihainim ol samting yumi lainim taim yumi mekim wok autim tok na long i stap bilong yumi. Yumi tingting strong long mekim wok long ol samting yumi lainim.—Jo. 13:17; Fl. 4:9.
2 Bekim Tok: Sediul bilong 2006 i makim wanpela minit moa bilong ol odiens long bekim tok long hap bilong ol bikpela tok bilong Baibel. Dispela i makim olsem brata ol i makim bilong kamapim bikpela tok bilong Baibel i mas pinisim tok bilong em insait long 5-pela minit na i no 6-pela minit. Na tu, ol bratasista i bekim tok ol i mas tingim taim. Sapos brata o sista i redi gut pastaim, em inap bekim tok insait long 30 seken o aninit long en. Inap olsem 10-pela bratasista i ken bekim tok insait long dispela 5-pela minit ol i makim bilong odiens.
3 Ol Tok i Skulim Man: Ol brata i mekim bikpela tok bilong Baibel na instraksen tok i mas kamapim gut tok ol i mekim, long wanem, em bai helpim wok bilong yumi long autim tok na ol samting yumi mekim long i stap bilong yumi. Brata i mekim dispela tok i no ken kirapim tasol laik bilong odiens long mekim samting. Em i mas kamapim stret wanem samting ol i mas mekim, olsem wanem ol i ken mekim, na stori long gutpela samting i save kamap taim man i mekim olsem. Em inap tok: “Dispela tok bilong ol ves hia i stiaim yumi long mekim olsem,” o “Yumi ken mekim wok long ol dispela skripsa long dispela rot long taim bilong autim tok.” Ol elda na kongrigesen sevan em ol i save long ol samting i save kamap long hap bilong ol, ol i mas kamapim klia olsem wanem ol bratasista i ken bihainim dispela tok ol i mekim.
4 Ol i ken kamapim ol stori bilong ol man long Baibel bilong helpim ol bratasista. Taim brata i stori pinis long wanpela man bilong Baibel, orait em i ken tok, “Ating wankain samting olsem inap painim yu tu.” Em i mas skelim gut stori bilong man bilong Baibel em i laik kamapim na dispela tok i mas stret wantaim ol narapela ves i stap klostu long ves em i kamapim, na olgeta narapela tok bilong Baibel, na ol tok “wokboi i gat gutpela tingting” i bin kamapim.—Mt. 24:45.
5 Man i gat gutpela tingting em bai mekim gutpela wok long save em i kisim. “Nambawan samting yu mas kisim, em i gutpela tingting.” (Snd. 4:7) Taim yumi wok long kisim gutpela tingting na save long rot bilong Skul Tiokratik Bilong Autim Tok, i gutpela yumi mekim pasin bilong yumi long skulim ol narapela i kamap gutpela moa.