Pasin Bilong Kirapim Baibel Stadi Long Buk Baibel i Tok
Planti bilong yumi bai amamas long mekim wanpela Baibel stadi sapos yumi inap long kirapim wanpela. Nupela buk Tru Tru Baibel i Tok Wanem? inap helpim yumi long mekim olsem. Ol tok i stap long pes 3-7 long buk em i bilong helpim yumi long kirapim man bilong haus long toktok long Baibel. Ol bratasista em nau tasol ol i kirap autim tok, ol tu inap mekim wok long dispela buk bilong kirapim ol Baibel stadi.
◼ Yu ken mekim wok long pes 3:
Taim yu stori pinis long wanpela hevi i kamap long hap bilong yupela em ol man i tingting planti long en, orait soim man bilong haus ol askim long strongpela rait i stap long pes 3, na askim man bilong haus long kamapim tingting bilong em. Opim buk i go long pes 4-5.
◼ O yu ken soim piksa i stap long pes 4 na 5:
Yu ken tok: “Bai yu amamas sapos ol samting i kamap olsem i stap long piksa hia?” O yu ken tok: “Yu laikim wanem samting long dispela piksa?” Putim gut yau long bekim bilong man.
Sapos man bilong haus i laikim tok bilong wanpela bilong ol skripsa, kamapim tok Baibel i mekim long dispela samting long rot bilong skelim ol paragraf long buk i stori long dispela samting. (Lukim blok i stap long dispela namel pepa.) Skelim ol paragraf olsem yu save mekim long taim yu stadi wantaim man long Baibel. Yu ken mekim olsem insait long 5-pela i go 10-pela minit long namba wan taim yu bungim man.
◼ Narapela rot, em yu ken mekim wok long pes 6 na kirapim man bilong haus long kamapim tingting bilong em:
Soim man bilong haus ol askim i stap daunbilo long pes, na askim em, “Yu save tingting planti long wanpela bilong ol dispela askim?” Sapos em i kamapim olsem em i laik save long wanpela bilong ol askim, orait soim em ol paragraf insait long buk i kamapim bekim bilong dispela askim. (Lukim blok i stap long dispela namel pepa.) Taim yutupela i skelim ol tok long paragraf wantaim, yu mekim pinis wanpela Baibel stadi.
◼ Yu ken mekim wok long pes 7 bilong soim pasin bilong mekim Baibel stadi:
Ritim 3-pela sentens long namba wan paragraf i stap long pes 7, na opim buk i go long sapta 3 na mekim wok long paragraf 1 i go 3 na soim man bilong haus long pasin bilong mekim stadi. Stretim rot bilong go bek lukim em na bekim ol askim i stap long paragraf 3.
◼ Pasin bilong mekim gobek:
Taim yu mekim pinis namba wan stadi, stretim rot bilong toktok gen wantaim man long Baibel. Yu ken tok: “Insait long sampela minit tasol, yumi bin kisim save long tok Baibel i mekim long wanpela bikpela samting. Long narapela taim, yumi ken stori long [givim em wanpela askim em yupela bai stori long en bihain]. Em orait sapos long wankain taim long neks wik mi kam bek na yumi stori long dispela samting?”
De bilong Jehova i kam klostu olsem na em i wok yet long givim ol samting bilong helpim yumi long mekim wok yumi mas mekim. (Mt. 28:19, 20; 2 Ti. 3:17) Yumi mas mekim gutpela wok long dispela nupela tul bilong kirapim ol Baibel stadi.
[Blok long pes 5]
Toktok Long Ol Skripsa i Stap Long Pes 4-5
◻ Kamapim Tok Hait 21:4 (p. 27-8, par. 1-3)
◻ Aisaia 33:24; 35:5, 6 (p. 36, par. 22)
◻ Jon 5:28, 29 (p. 72-3, par. 17-19)
◻ Song 72:16 (p. 34, par. 19)
Bekim Bilong Ol Askim Long Pes 6
◻ Bilong wanem yumi karim pen na hevi? (p. 108-9, par. 6-8)
◻ Olsem wanem yumi ken karim hevi bilong ol samting yumi tingting planti long en? (p. 184-5, par. 1-3)
◻ Olsem wanem yumi ken helpim famili bilong yumi long i stap amamas? (p. 143, par. 20)
◻ Wanem samting i painim yumi taim yumi dai? (p. 58-9, par. 5-6)
◻ Bai yumi lukim gen ol famili bilong yumi i dai pinis? (p. 72-3, par. 17-19)
◻ Bilong wanem yumi ken bilip tru olsem God bai truim ol tok promis bilong em long ol samting bai kamap bihain? (p. 24-5, par. 17)