Helpim Ol Sumatin Long Pilim Ol Gutpela Pasin Bilong Jehova
1 Taim yumi autim tok na kamapim ol disaipel, yumi skulim ol narapela long ol tok i tru bilong Baibel. Tasol yumi no mekim dispela samting tasol. Yumi helpim tu ol man long save long Jehova olsem wanpela man tru na long ol gutpela pasin bilong em. Taim ol man i gat gutpela bel i kisim stretpela save long God, ol i pilim tru dispela samting, na dispela i kirapim ol long senisim sampela pasin bilong ol bambai ‘ol inap wokabaut long pasin bilong ol manmeri tru bilong Bikpela, na bai em i laikim olgeta pasin bilong ol.’—Kl. 1:9, 10; 3:9, 10.
2 Nupela Buk Bilong Stadi: Kirap long namba wan sapta, buk Baibel i Tok i stori long ol pasin bilong Jehova. Namba wan sapta i bekim ol dispela askim: Tru tru God i save tingim yu?, God i gat wanem kain ol pasin? na Yumi inap i go klostu long God? Dispela sapta i kamapim tu pasin holi bilong Jehova (par. 10), stretpela pasin na pasin sori bilong em (par. 11), pasin laikim bilong em (par. 13), strong bilong em (par. 16), pasin marimari bilong em, em i save rausim sin, na em i isi long ol man (par. 19). Paragraf 20 i mekim dispela tok: “Taim yu kisim save moa long Jehova, bai yu pilim moa yet olsem em i wanpela man i stap tru tru, na bai yu laikim em moa yet na stap klostu long em.”
3 Olsem wanem yumi ken yusim buk Baibel i Tok bilong helpim ol Baibel sumatin long i go klostu long Jehova? Taim yumi skelim pinis wanpela paragraf i stori long wanpela pasin bilong God, yumi ken askim sumatin olsem, “Dispela tok i lainim yu long wanem pasin bilong Jehova?” o “Olsem wanem dispela tok i soim olsem God i save tingim yu?” Taim yumi kamapim ol kain askim olsem long taim bilong stadi, yumi lainim ol sumatin long tingim tingim long bel ol tok ol i lainim na yumi helpim ol long pilim tru ol gutpela pasin bilong Jehova.
4 Mekim Wok Long Riviu Blok: Long pinis bilong olgeta wan wan sapta, kirapim sumatin long kamapim tingting bilong em yet long wan wan bikpela tok i stap long blok “Ol Tok Baibel i Lainim Yumi Long En.” Stiaim tingting bilong sumatin i go long ol skripsa. Bilong kirapim sumatin long kamapim tingting i stap long bel bilong em, yu inap askim em, “Yu ting olsem wanem long tok Baibel i mekim long dispela samting?” Taim yu mekim olsem, yu kamapim klia ol bikpela tok bilong sapta, na tu, yu luksave long ol samting sumatin i bilip tru long en. Dispela bai helpim sumatin long kirap long kisim pasin bilong pas gut wantaim Jehova.