Nupela Program Bilong Kibung Sekit

I stret yumi litimapim nem bilong Jehova. Olsem wanem yumi ken litimapim nem bilong em? Wanem samting i mekim na sampela i hatwok long litimapim nem bilong Jehova? Ol man i litimapim nem bilong God long nau ol i kisim wanem ol blesing? Program bilong kibung sekit bilong 2008 bai kamapim ol gutpela bekim bilong ol dispela askim. As tok bilong kibung em ‘Mekim Olgeta Samting Bilong Givim Biknem Long God.’ (1 Ko. 10:31) Tingim ol tok yumi bai harim insait long dispela tupela de we yumi bai kisim planti gutpela tok bilong Baibel.

Wasman distrik bai mekim tok “Bilong Wanem Yumi Mas Givim Biknem Long God?” na “Stap Olsem Gutpela Piksa Long Mekim Ol Samting God i Laik Bai Yumi Mekim.” Em bai mekim pablik tok, “Husat i Save Litimapim Nem Bilong God?” na laspela tok, “Ol i Wok Wantaim Long Givim Biknem Long God Long Olgeta Hap Bilong Graun.” Em bai lukautim tu Skul Tiokratik Bilong Autim Tok. Wasman sekit bai mekim tok “Kisim Amamas Long Kamapim Lait Bilong Glori Bilong God,” “Sampela Tok Bilong Helpim Sekit,” na “ ‘Sanap Strong Yet Long Dispela Tok Tru,’ ” em 2 Pita 1:12 i as bilong dispela tok. Na tu, bai yumi kisim save long olsem wanem “Wok Painia i Save Givim Biknem Long God.” Namba wan tok i gat fopela hap em “Givim Biknem Long God Long Olgeta Samting Yumi Mekim,” na long dispela tok bai yumi skelim gut mining bilong dispela tok i stap long 1 Korin 10:31. Narapela tok i gat fopela hap “Mekim Wok Holi Bilong Litimapim Nem Bilong Jehova” bai skelim narapela narapela samting bilong lotu bilong yumi. Long Sande bai yumi mekim stori bilong Wastaua na skelim teks bilong de. Ol man inap kisim baptais tu long dispela kibung.

Planti manmeri i no laik tok olsem i gat God i stap. Ol wok samting bilong ol man i pulim tingting bilong planti na ol i no tingim biknem bilong Jehova. (Jo. 5:44) Tasol yumi save em i gutpela samting tru long lusim hap taim bilong tingting long olsem wanem yumi ken ‘Mekim Olgeta Samting Bilong Givim Biknem Long God.’ Stretim ol samting bambai yu ken stap long dispela kibung na kisim helpim long olgeta 4-pela hap bilong program.