Nupela Program Bilong Spesel De Kibung

As tok bilong spesel de kibung bilong 2008 em “Yumi Olsem Graun​—⁠Jehova i Man Bilong Wokim Sospen,” em Aisaia 64:8 i as bilong en. Ol tok bilong Baibel dispela program bai kamapim bai helpim yumi long pilim moa yet savetingting, stretpela pasin, strong, na pasin laikim bilong Jehova, em Bikpela Man Bilong Wokim Sospen Graun.

Tok bilong wasman sekit, “Mekim Wok Bilong Autim Tok Olsem Ol Gutpela Sospen,” bai soim olsem wanem planti man moa i kisim planti blesing taim ol i save long tok i tru na i autim dispela tok long ol narapela. Narapela tok “Pasin Bilong Tingim Tingim Long Bel Em Bai Lukautim Yu” bai soim olsem wanem pasin bilong tingim tingim ol stretpela stiatok bilong Jehova i save lukautim yumi. Brata em brens i salim bai mekim tok “Yumi No ‘Wokabaut Wankain Olsem Ol Man Bilong Dispela Graun’ ” na “Larim Bikpela Man Bilong Wokim Sospen Graun i Stretim Stretim Yu.” Ol tok bilong strongim bel bilong papamama na ol yangpela, em “Ol Yangpela Em Jehova Inap Mekim Wok Long Ol” na “Bikpela Wok Bilong Papamama Long Stretim Stretim Ol Pikinini.” Long rot bilong ol soim na inteviu, bai yumi amamas long harim na luksave long ol gutpela wok ol brata na sista bilong yumi i mekim long wok autim tok. Ol pablisa husat i laik kisim baptais bilong makim olsem ol i dediket pinis long God, ol i mas toksave hariap long wasman siaman. Yupela i mas bringim i kam Wastaua bilong stadi long dispela wik bilong spesel de kibung.

Olgeta samting Bikpela Man Bilong Wokim Sospen Graun i tingting pinis long mekim, em bai mekim. Tasol yumi olgeta wan wan i mas makim samting yumi bai mekim taim em i wok long stretim stretim yumi. Ol man i daun long ol lo bilong Jehova na i larim em i stretim stretim ol​—⁠olsem graun malumalum long han bilong man bilong wokim sospen graun​—⁠pasin bilong ol bai senis na i kamap gutpela na ol i ken kamap sospan bilong mekim gutpela wok. Taim yumi wok gut wantaim Jehova, yumi litimapim wok king bilong em na kisim planti blesing.