Bikpela Wok Autim Tok, Winim Olgeta Taim Bipo!
Winim 100 yia, ol Witnes Bilong Jehova i bin stretim gut wok bilong autim gutnius. (1 Ko. 9:23) Dispela wok bilong autim tok i go bikpela tru, winim olgeta taim bipo, na yumi autim dispela tok long winim 100 tok ples na long 230 kantri samting. (Mt. 24:14) Tasol bilong wanem yumi mas mekim dispela wok? Na olsem wanem yumi inap mekim dispela wok long olgeta hap graun?
Vidio Jehovah’s Witnesses—Organized to Share the Good News i bekim ol dispela askim na i stori gut long planti samting bilong wok bilong yumi i kamap long olgeta hap. Taim yu lukim dispela vidio, tingim ol dispela askim: (1) Olsem wanem ol i stretim na stiaim wok bilong yumi? (2) Olsem wanem Dipatmen Bilong Raitim Tok (Writing Department), Dipatmen Bilong Helpim Ol Lain i Tanim Tok (Translation Services), Dipatmen Bilong Wokim Piksa (Art Department), na Dipatmen Bilong Wokim Ol Vidio (Audio/Video Services Department), i helpim wok bilong autim gutnius? (3) Bilong wanem ol i mekim bikpela wok bilong prinim na salim ol buk na nius? (Jo. 17:3) (4) Ol i save prinim hamas buk na nius long olgeta wan wan yia? (5) Ol buk na nius bilong Baibel i bin kamapim wanem ol gutpela samting? (Hi. 4:12) (6) Ol i bin mekim wanem bilong helpim ol aipas na yaupas? (7) Olsem wanem yumi kisim mani bilong mekim wok bilong yumi? (8) Hospital Infomesen Sevis, Dipatmen Bilong Wok Autim Tok, na Dipatmen Bilong Kibung i helpim yumi olsem wanem? (9) Yu wanpela Witnes Bilong Jehova, olsem na olsem wanem dispela vidio i bin helpim yu long kliagut na tenkyu moa yet long (a) bikpela wok oganaisesen bilong Jehova i mekim bilong autim gutnius? (b) winim 100 famili Betel i stap long olgeta hap bilong graun? (c) skul ol wasman na ol misineri i save kisim? (d) pasin bilong skelim teks bilong de long olgeta moning na redim ol miting bilong kongrigesen long olgeta wik? (e) ol gutpela samting yumi kisim taim yumi kam long ol bung Kristen bilong yumi? (f) sindaun bilong ol man long Paradais long graun bai wanem kain? (Ais. 11:9) (g) insait long wok bilong bungim ol manmeri em dispela wok i no pinis yet?—Jo. 4:35.
Wanem gutpela samting i bin kamap taim yu soim dispela vidio long ol wanblut, ol man yu save long ol, ol gobek, na ol Baibel stadi? Gutpela sapos yu soim dispela vidio long wanpela man na autim gutnius long em.—Mt. 28:19, 20.