Mekim Gutpela Wok Long Taim Bilong Yu Long Autim Tok
1 Yumi gat bikpela wok bilong mekim long wok autim tok, na taim i sot pinis. (Jo. 4:35; 1 Ko. 7:29) Taim yumi stretim na redim gut ol samting bilong autim tok, yumi ken mekim gutpela wok long taim bilong yumi long autim tok.
2 Redi Gut: Paslain long yu go long bung bilong wok autim tok, yu mas redim ol buk na nius yu laik tilim na redim ol tok yu laik autim long ol man. Taim brata i pinisim bung long rot bilong beten, grup bai go stret long teritori. Dispela bai mekim na yu na ol narapela i ken mekim bikpela wok moa insait long hap taim ol i makim bilong autim tok.
3 Sapos ol i makim yu long lukautim grup bilong wok autim tok, orait kirapim bung long taim stret. No ken pulim bung i go longpela—em i no ken abrusim 10 i go inap 15 minit. Paslain long yu salim grup i go, olgeta i mas save ol i wok wantaim husat na grup bai autim tok long wanem hap.
4 Long Taim Bilong Autim Tok: Taim bung bilong autim tok i pinis, no ken sanap nating nating, long wanem, dispela inap mekim na grup i no kirap wok hariap. Sapos yu save olsem yu bai lusim teritori hariap, ating yu ken stretim rot bilong yu yet long go na bai ol narapela long grup i ken autim tok i go yet. Taim yu autim tok wantaim grup, tingim ol narapela husat i wetim yu long pinisim tok bilong yu. Bilong mekim olsem, ating long gutpela pasin yu ken lusim man i laik tok pait o pasim tok wantaim man i laik harim tok long i go bek lukim em.—Mt. 10:11.
5 Taim yu mekim ol gobek, i gutpela yu mekim pastaim ol gobek i stap long wankain hap paslain long yu go long narapela hap. Ating yu inap ringim sampela gobek bilong save ol i stap long haus o nogat. (Snd. 21:5) Sapos yu go lukim wanpela gobek wantaim liklik grup, na yu ting yu bai toktok longpela taim liklik wantaim gobek, ating ol narapela long grup i ken autim tok long hap i stap klostu o go lukim narapela gobek i stap klostu.
6 Yumi stap long taim bilong bungim kaikai long gaden, olsem bungim ol manmeri. (Mt. 9:37, 38) Klostu nau dispela wok bai i pinis. Olsem na yumi mas i gat laik long mekim gutpela wok long taim bilong yumi long mekim wok autim tok.