Askim
◼ I stret wanpela Witnes Bilong Jehova i kisim marasin o helpim long haus sik em wanpela lotu i bosim?
Sampela lotu i save bosim ol haus sik i lukautim ol sikman na givim marasin samting. Planti taim ol dispela haus sik i no stap bilong strongim Bikpela Babilon. (KTH 18:2, 4) Ating pastaim lotu i bin kamapim dispela haus sik olsem wanpela bisnis bilong kisim mani long en. Long nau, sampela haus sik i holim nem tasol bilong wanpela lotu, tasol sampela haus sik i gat ol pater o sister i save mekim sampela wok.
Sapos wanpela Witnes Bilong Jehova i mas i go long haus sik, em i mas wokim disisen bilong em yet olsem em bai i go long wanpela haus sik em lotu i bosim o nogat. Maus bilong bel bilong wanpela inap orait long em i mekim olsem, tasol ating maus bilong bel bilong narapela i no orait long dispela. (1 Ti. 1:5) I gat ol samting i stiaim disisen ol Witnes i mekim, na i gutpela long skelim ol dispela samting.
Olsem, ating i no gat narapela haus sik i stap klostu, dispela haus sik tasol bilong wanpela lotu i stap. O sapos i gat narapela haus sik i stap klostu, tasol haus sik em lotu i bosim i gat nem olsem ol i save lukautim gut moa ol sikman. O haus sik em lotu i bosim, dispela haus sik tasol i gat marasin o ol masin samting i stret long wanpela sik, o dokta o dokta bilong katim man em yu go lukim, em inap mekim wok long dispela haus sik tasol. Na tu, sampela haus sik em lotu i bosim inap rispek long bilip Kristen bilong yu long ol samting bilong blut, tasol ating sampela narapela haus sik i no save mekim olsem. Em ol samting yu mas tingim taim yu wokim disisen long wanem haus sik bai yu go long en.
Sapos yu go long haus sik em lotu i bosim, yu ken ting olsem yu baim ol long mekim wanpela wok bilong helpim yu, na em tasol. Yu ken ting olsem haus sik em wanpela bisnis em lotu i bosim, na taim yu baim ol long mekim wanpela wok, yu no givim mani bilong helpim wanpela lotu giaman. Yu baim tasol sampela marasin o givim pe bilong wok ol i mekim.
Yu wanpela Kristen, olsem na sapos yu go long haus sik bilong wanpela lotu, yu no ken tru insait long sampela pasin bilong lotu giaman. Na tu, yu no ken tok “Pater” o “Sister” long sampela husat i wok o i visit long kain haus sik olsem. (Mt. 23:9) Yu mas ting olsem yu go long haus sik bilong kisim marasin na helpim, na em tasol.
Taim yu edmit long haus sik, yu ken tokim ol nes samting olsem yu wanpela Witnes Bilong Jehova na yu laik sampela elda bai kam lukim yu. Dispela bai mekim na taim yu stap long haus sik, ol elda bai helpim yu long ol samting bilong spirit.—1 Te. 5:14.
Yumi mas tingim ol dispela samting, na olgeta wan wan i mas skelim sindaun bilong ol yet na wokim disisen long ol bai go long wanem haus sik.—Ga. 6:5.