Yumi Daunim Ol Bilip Giaman

¹ Inap planti handet yia, long rot bilong ol tok na bilip giaman, Satan i bin paulim tingting na bel bilong planti manmeri. Em i bin kamapim ol kain bilip olsem God Triwan, man i gat wanpela spirit i no save dai, na helpaia. Em i kirapim ol man long kisim tupela tingting olsem i gat God i stap o nogat, na God i kamapim ol tok bilong Baibel o nogat. Pasin bilong bel nogut long ol man bilong narapela lain na skin, na pasin bilong ol man long litimapim kantri bilong ol yet i narapela bikpela samting i save pasim ol man long kisim tok i tru. (2 Ko. 4:⁠4) Olsem wanem yumi ken daunim ol kain strongpela bilip giaman olsem?​—⁠2 Ko. 10:​4, 5.

² Ol i Pilim Long Bel: Planti man i pilim long bel ol bilip ol i bin lainim. Sampela i bin holim ol bilip giaman kirap long taim ol i pikinini yet. Bilong helpim ol kain lain olsem, yumi mas toktok long pasin i soim olsem yumi rispektim tingting bilong ol.​—⁠1 Pi. 3:⁠16.

³ Yumi ken soim rispek long ol kain man olsem long rot bilong larim ol i stori long samting ol i bilip long en na bilong wanem ol i bilip long en. (Jem. 1:19) Ating sampela long famili bilong ol i dai pinis na ol i laik lukim ol gen, olsem na ol i bilip olsem ol man i gat wanpela spirit i no save dai. O ol i save mekim krismas samting, long wanem, ol i amamas long bung wantaim famili long ol kain taim olsem. Taim yumi putim yau long tok bilong ol, dispela bai helpim yumi long save long tingting i stap long bel bilong ol na i helpim yumi long mekim ol gutpela tok.​—⁠Snd. 16:⁠23.

⁴ Bihainim Pasin Bilong Jisas: Jisas i stap gutpela piksa long yumi ken bihainim taim em i bekim ol askim bilong wanpela man i save gut long Lo. Jisas i no tokim man long samting em i mas mekim, ating man bai sakim ol kain tok olsem, long wanem, ol samting em i bilip long en i bikpela samting long em. Jisas i kamapim ol tok bilong Baibel, em i kirapim man long kamapim tingting bilong em yet, na kamapim wanpela tok piksa i helpim man long kisim stretpela tingting.​—⁠Lu. 10:​25-​37.

⁵ Tok i tru i stap long Baibel inap mekim na ol man i no bilip moa long ol bilip giaman bipo ol i bin holim strong. (Hi. 4:12) Taim yumi no les long kamapim tok i tru long ol man, ating yumi inap helpim ol long sakim ol bilip giaman na kirap bihainim tok i tru i mekim ol i kamap fri.​—⁠Jo. 8:⁠32.