Askim

◼ Sapos wanpela man na meri husat i laik yusim Haus Kingdom bilong mekim weding bilong ol, ol i mas toktok wantaim ol elda long wanem ol samting?

Ol weding em ol i bihainim ol stiatok bilong Baibel na mekim, dispela i save givim biknem long Jehova. Dispela em tru long ol weding i kamap long Haus Kingdom, long wanem, ol samting i kamap long Haus Kingdom i save kamapim klia long ol man i sindaun klostu olsem oganaisesen bilong yumi em i wanem kain. Bilong “bihainim stret ol gutpela pasin bilong lotu,” i stret ol elda bilong kongrigesen i toktok wantaim tupela husat i laik marit long ol samting bilong weding sapos tupela i laik yusim Haus Kingdom bilong mekim weding.​—⁠1 Ko. 14:⁠40.

Tupela husat i laik yusim Haus Kingdom bilong mekim weding, ol i mas raitim pas i go long sevis komiti bilong kongrigesen i save bung long dispela Haus Kingdom, na askim long yusim Haus Kingdom. Ol i mas salim pas bilong ol paslain tru na makim det na taim em ol i laik yusim Haus Kingdom. Ol i mas save olsem ol elda i no inap senisim ol sediul bilong miting bilong larim weding i kamap. Na tu, man na meri i laik marit, ol i mas i gat gutnem, na ol i bihainim ol stiatok bilong Baibel na stretpela lo bilong Jehova.

Bilong weding i ken litimapim nem bilong God, tupela i mas toktok wantaim sevis komiti long ol samting bilong weding paslain long ol i pinisim wok bilong stretim olgeta samting. Tru ol elda bai i no inap strong long tupela i bihainim tingting bilong ol long samting tupela i mas mekim, tasol sapos samting tupela i laik mekim i no stret wantaim tok bilong Baibel, orait tupela bai bihainim tok bilong ol elda. Ol i mas pilaim tasol ol musik i stap long Kingdom Melodies na buk singsing bilong yumi. Ol i mas kisim tok orait tu bilong bilasim Haus Kingdom na bilong stretim na putim ol sia samting. Sapos ol i kisim ol piksa o vidio samting, dispela i no ken pulim tingting bilong ol man na ol i no tingim bikpela samting bilong dispela bung. Ol elda i ken larim tupela i mekim traim weding long Haus Kingdom, tasol dispela i no ken kamap long taim bilong ol miting samting. Ol i no ken putim ol weding invatesen long notisbot bilong Haus Kingdom. Tasol ol elda i ken mekim sotpela toksave long kongrigesen long taim bilong Miting Bilong Wok olsem weding bai kamap long Haus Kingdom.

Tru, i no gat wanpela lo i tok ol Kristen i baptais pinis ol tasol i mas insait long ol samting bilong marit, tasol i no gutpela long larim ol man i insait long ol samting bilong marit sapos pasin bilong ol i no stret olgeta wantaim ol stiatok bilong Baibel o ol lain i stap long weding i gat tok long pasin bilong ol. Wanpela elda i mas mekim tok bilong marit. Ol elda, ol i tisa bilong Tok Bilong God, olsem na ol i gat save inap long kamapim ol stiatok bilong Baibel i stret long dispela bikpela bung.​​—⁠1 Ti. 3:⁠2.

Sampela samting inap kamap long weding na inap daunim gutnem bilong elda, olsem na elda husat bai givim tok bilong marit em i mas kisim save long wanem ol samting bai kamap long weding. Em bai bung wantaim tupela husat i laik marit bilong kisim save olsem ol i bihainim stretpela pasin taim ol i bin pren; em i gutpela long tupela i tokaut stret na tok tru long em. Sapos wanpela bilong tupela i bin marit bipo, orait em i mas kamapim klia olsem em inap marit gen olsem tok bilong Baibel na lo bilong gavman i makim. (Mt. 19:⁠9) Na tu, em i mas soim long ol elda dispela pepa i tokaut olsem marit bilong em i bruk pinis.

Taim tupela i toktok na wok gut wantaim ol elda, weding bai kamap olsem wanpela bung em olgeta i ken amamas long en.​​—⁠Snd. 15:22; Hi. 13:⁠17.