Redim Gut Ol Samting Bilong Memorial
Em i wanpela gutpela samting tru long ol disaipel bilong Krais long redim gut ol samting long nait bilong tingim indai bilong Jisas Krais! (Lu. 22:19) Yumi mas mekim wanem ol samting bilong redi long Memorial?
◼ Taim na Ples: Olgeta man i mas save gut long taim stret na ples em Memorial bai kamap long en. Sapos 2-pela o 3-pela kongrigesen bai mekim Memorial long wanpela Haus Kingdom, orait em i bikpela samting long kamap long taim stret na lusim Haus Kingdom hariap liklik, long wanem, i no gat bikpela haptaim namel long tupela miting. Na ol kongrigesen i mas wok gut wantaim long stretim ol samting bambai ol man i no ken pas pas long dua, na long ples bilong putim ol ka.
◼ Invatesen: Olsem wanem? Olgeta wan wan pablisa i kisim pinis invatesen pepa bilong ol na ol i save long ol tok i stap insait? Yu bin mekim traim long pasin bilong tilim dispela invatesen pepa? Bai yu givim invatesen pepa long husat? Wok strong long tilim olgeta invatesen pepa.
◼ Trenspot: Sampela husat i gat laik long kam long Memorial, na sampela brata na sista tu, ating ol i mas kisim helpim long sait bilong trenspot o sampela narapela samting. Yupela i bin stretim wanem ol samting bilong helpim ol?
◼ Bret na Wain: Yupela i no ken tilim bret na wain paslain long taim san i go daun pinis. Yupela i mas wokim bret na baim wain i stret bilong mekim Memorial.—Lukim Wastaua bilong Februeri 15, 2003, p. 14-15, par. 14, 17.
◼ Haus Kingdom: Klinim gut Haus Kingdom paslain long taim bilong Memorial. Redim ol plet, ol glas, na wanpela gutpela tebol na laplap bilong karamapim tebol. Paslain long bung i kirap, kisim ol dispela samting i kam long Haus Kingdom na putim gut long ples bilong ol. Sapos yupela i mekim wok long narapela ples bung na i no Haus Kingdom, orait stretim ol samting bilong saun olsem maikrofon samting na bai ol man i kam bung i ken harim gut tok em brata i mekim. Makim ol atendan na ol brata bilong karim bret na wain. Toksave long ol long ol samting ol bai mekim, na long ol i mas pasim gutpela klos na mekim gut skin.
Long dispela bikpela bung tru, em Memorial bilong tingim indai bilong Jisas Krais, yumi wan wan na kongrigesen olgeta i laik redim gut ol samting. Tru tumas, Jehova bai blesim tru olgeta husat i kamapim klia long bel olsem ol i amamas long olgeta samting Jehova i mekim bilong ol manmeri i ken kisim laip long rot bilong Pikinini bilong em, Jisas Krais.