Skulim Man Long Ol Tok i No Hatwok Long Kisim
1. Wanem wanpela bikpela samting bilong mekim gut wok tisa?
1 Pasin bilong mekim ol tok i no hatwok long kisim, em wanpela bikpela samting bilong mekim gut wok tisa. Taim yumi tingim pasin bilong Bikpela Tisa, Jisas, long mekim wok tisa, dispela inap helpim yumi long ‘skulim gut’ ol man.—2 Ti. 4:2; Jo. 13:13.
2. Wanem samting i insait long pasin bilong skulim man long ol tok i no hatwok long kisim? Wanem gutpela samting i save kamap long dispela pasin bilong skulim man?
2 Mekim Ol Tok i No Hatwok Long Kisim: Long Bikpela Tok Long Maunten, Jisas i bin kamapim sampela bikpela tok i tru, na em i mekim ol tok i no hatwok long ol man i kisimgut. (Mt., sap. 5-7) Ol man i harim tok bilong Jisas ol i “kirap nogut tru long skul bilong en.” Ol polisman i go bilong holimpas em ol i kirap nogut long ol tok bilong em na ol i tok: “Bipo i no gat wanpela man i mekim toktok olsem dispela man i mekim.” (Mt. 7:28, 29; Jo. 7:46) Bilong kamapim klia tok i tru long ol man, yumi no gat wok long mekim ol strongpela tok, o kolim ol bikpela tok, o mekim ol longpela tok piksa, nogat. Long rot bilong mekim ol tok ol man i save long en, yumi inap kamapim klia tok i tru long ol.
3. Bilong wanem sampela inap kamapim planti tok tumas long ol man? Olsem wanem yumi inap abrusim dispela pasin?
3 No Ken Kamapim Planti Tok Tumas: Jisas i tingim gut ol manmeri i harim tok bilong em na em i no kamapim planti tok tumas taim em i autim tok long ol. (Jo. 16:12) Yumi mas tingim ol man yumi autim tok long ol na mekim ol tok i helpim ol, na moa yet taim yumi autim tok long ol wanblut, ol nupela man i laik harim tok, o ol pikinini. Maski i luk olsem ol i putim gut yau, yumi no ken kamapim planti tok tumas. Ol man i gat gutpela bel ol bai wok yet long kisim save long trupela God, Jehova.—Jo. 17:3; 1 Ko. 3:6.
4. Bilong wanem i gutpela long kamapim klia ol bikpela tok tasol na no ken stori long ol liklik liklik samting?
4 Kamapim Klia Ol Bikpela Tok: Jisas i no mekim planti tok tumas taim em i skulim ol man. Taim em i tok: “Olgeta manmeri i stap long matmat ol bai i . . . kam ausait,” long dispela taim i no taim bilong stori planti long tupela samting bai painim ol man i kirap bek, nogat. (Jo. 5:28, 29) Taim yumi mekim ol Baibel stadi, yumi mas kamapim klia ol bikpela tok tasol na no ken stori long ol samting em buk i no stori long en.
5. Yumi inap kisim wanem blesing sapos yumi skulim ol man long ol tok i no hatwok long kisim?
5 Yumi amamas tru long Jehova i bin skulim yumi long olgeta tok yumi mas save long en, na em i mekim olsem long rot i no hatwok long yumi kisim! (Mt. 11:25) Gutpela sapos yumi bihainim dispela pasin bilong skulim ol man na amamas long ol gutpela samting i kamap long wok autim tok bilong yumi.