Tripela Samting Bilong Helpim Wok Tisa i Kamap Gutpela Moa
1. Bilong wanem yumi mas i gat laik long mekim gut moa wok tisa?
1 Olgeta Kristen i tisa. Maski yumi bungim man long namba 1 taim, o go bek lukim man bilong kirapim em long kisim sampela save moa, o mekim Baibel stadi, yumi wok long givim save long man. Na ol tok yumi skulim ol man long en i spesel. Yumi kamapim mining bilong “ol Rait Holi,” we inap ‘givim savetingting na bai God i ken kisim bek’ ol man. (2 Tim. 3:15) Em wanpela gutpela wok tru! I gat 3-pela samting inap helpim wok tisa bilong yumi i kamap gutpela moa.
2. Taim yumi skulim ol man, olsem wanem yumi inap mekim ol tok i no hatwok long kisim?
2 Ol Tok i No Hatwok Long Kisim: Taim yumi save gut long wanpela samting, em isi tru long lusim tingting olsem ating narapela man bai hatwok long kliagut long en sapos em i no save long dispela samting. Olsem na taim yumi mekim stadi, no ken stori long planti samting. Kamapim ol bikpela poin tasol. Pasin bilong mekim planti toktok i no mak bilong gutpela tisa. (Snd. 10:19) Planti taim i gutpela moa long yumi ritim ol bikpela skripsa tasol. Taim yu ritim skripsa pinis, kamapim hap bilong skripsa i strongim poin bilong stadi. Bikpela Tok Long Maunten i stap long Matyu sapta 5 i go 7, i kamapim ol bikpela tok i tru, tasol Jisas i mekim ol tok i no hatwok long kisim na em i no mekim planti toktok.
3. Ol tok piksa inap mekim wanem? Wanem kain tok piksa i gutpela?
3 Ol Tok Piksa: Ol tok piksa i save kirapim man long wokim tingting, pilim tok long bel, na helpim em long tingim tok. No ken ting olsem yu mas kamap man bilong stori bilong mekim ol gutpela tok piksa. Planti taim Jisas i yusim ol sotpela tok piksa we i no hatwok long kisim. (Mat. 7:3-5; 18:2-4) Na tu, pasin bilong droim ol piksa long pepa inap helpim wok tisa bilong yu. Sapos yu tingting gut pastaim, yu inap kamapim ol gutpela tok piksa.
4. Olsem wanem yumi ken mekim gutpela wok long ol askim?
4 Ol Askim: Ol askim i mekim na sumatin i mas wokim tingting. Olsem na taim yu kamapim wanpela askim, no ken les kwik. Sapos yu yet i bekim askim hariap, bai yu no save sapos sumatin i kisimgut tok o nogat. Sapos bekim bilong em i no stret, no ken stretim em, mobeta yu kamapim sampela askim moa bilong stiaim em long mekim bekim i stret. (Mat. 17:24-27) Tru, yumi olgeta i no nambawan gutpela tisa, olsem na Baibel i kirapim yumi long tingim wok tisa bilong yumi. Taim yumi mekim olsem, yumi yet na ol man i harim tok bilong yumi bai kisim ol blesing i stap oltaim.—1 Tim. 4:16.