Save Gut Long Yusim Baibel

1. Baibel i gat wanem wok bilong en?

¹ Pasin bilong save gut long yusim Tok Bilong God bai helpim yumi long kamapim klia tok i tru long ol man yumi autim tok long ol, na skulim ol na kamapim long ples klia ol bilip giaman na ol bilip bilong ol tumbuna.​—⁠2 Ti. 2:15; 1 Pi. 3:⁠15.

2. Wanem samting bai helpim yu long save gut long painim ol skripsa?

² Save Gut Moa Long Baibel Bilong Yu: Wankain long pasin bilong yusim wanpela tul, save bilong yumi long mekim gut wok long en i kamap gutpela moa taim yu save gut long yusim. Sapos yu ritim Baibel olgeta, dispela bai helpim yu long kliagut long bikpela as tok bilong Baibel. Na dispela bai helpim yu tu long tingim gut ol skripsa na painim ol hariap. Taim yu save gut moa long ol tok bilong Baibel bai yu bilip tru long tok yu autim, na givim bel long autim tok long kain kain taim na ples, na long ol haus.​—⁠1 Te. 1:⁠5.

3, 4. (a) Wanem sampela rot bilong helpim yumi long save gut moa long Baibel? (b) Olsem wanem? Yu bin traim ol narapela rot bilong helpim yu long save gut moa long Baibel?

³ Kisim pasin bilong opim Baibel bilong yu na lukim ves taim brata i lukautim miting bilong kongrigesen i ritim. Taim yu mekim stadi bilong yu yet, na redim ol tok bilong ol miting, opim Baibel na ritim ol skripsa ol i no kamapim ol tok bilong en na tingting long olsem wanem yu ken bihainim. Planti i pilim olsem taim ol i ritim ol skripsa long Baibel stret, dispela i winim pasin bilong ritim long kompiuta o long pepa ol i prinim, long wanem, bihain taim ol i autim tok na ol i laik yusim ol dispela skripsa, em i isi long ol i painim.​—⁠Jo. 14:⁠26.

⁴ Sampela famili i makim wanpela taim bilong ol long tingim ol skripsa bilong Baibel. Ol i mekim olsem long rot bilong yusim ol hap pepa em ol i raitim sapta na ves bilong skripsa long wanpela sait na tok bilong en long narapela sait. Olgeta i senis senis long yusim dispela pepa na traim long kolim stret tok bilong skripsa o tingim dispela tok i stap long wanem skripsa. Pasin bilong mekim traim wok autim tok na pasin bilong yusim Baibel long bekim wanpela askim​—⁠dispela pasin tu bai mekim na save bilong yu long yusim Baibel i kamap gutpela moa.

5. Bilong wanem yumi laik save gut moa long yusim Baibel?

⁵ Baibel i winim olgeta narapela buk. Ol tok bilong en tasol inap long givim gutpela tingting long ol man na ‘bai God i kisim bek ol.’ (2 Ti. 3:15) Planti man long teritori bilong yumi ol i no save long ol gutpela tok i stap long Baibel, olsem na i gat as na yumi mas save gut moa long yusim Baibel bambai yumi ken soim ol tok Baibel i mekim.​—⁠Snd. 2:​1-5.