Nambawan Bikpela Wok Bilong Yumi
1. Olsem wanem Jisas i soim olsem wok autim tok i bikpela samting long em?
1 Wok autim tok em nambawan bikpela wok bilong Jisas. Em i wok strong tru, na em i wokabaut planti handet kilomita long olgeta hap bilong Palestain bilong autim tok long planti man. Em i no holim planti samting bilong skin bambai em inap lusim bikpela hap taim moa long wok autim tok. (Mt. 8:20) Taim ol manmeri i laik bai em i mas i stap na oraitim ol sikman, em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.”—Lu. 4:43.
2. Bilong wanem wok autim tok i bikpela samting tru long Jisas?
2 Bilong wanem wok autim tok i bikpela samting tru long Jisas? Nambawan samting em i tingim, em nem bilong Jehova i mas i stap holi. (Mt. 6:9) Em i laikim tru Papa bilong em long heven, olsem na em i laik inapim laik bilong Papa na bihainim olgeta tok bilong Em. (Jo. 14:31) Na tu, em i tingim tru ol man na i laik helpim ol.—Mt. 9:36, 37.
3. Olsem wanem yumi inap soim olsem wok autim tok i bikpela samting long yumi?
3 Bihainim Pasin Bilong Jisas: I gat planti samting long dispela graun inap pulim tingting na bikpela haptaim bilong yumi, na dispela inap mekim na i hatwok long yumi holim wankain tingting long wok autim tok olsem Jisas i bin holim. (Mt. 24:37-39; Lu. 21:34) Olsem na yumi mas skelim wanem ol samting i bikpela samting moa, na makim taim bilong redi na insait long wok autim tok long olgeta taim. (Fl. 1:10) Yumi no laik holim planti samting bilong skin na insait tumas long ol samting bilong dispela graun, nogat.—1 Ko. 7:31.
4. Bilong wanem yumi mas tingim wanem ol samting i bikpela samting long nau?
4 Taim i no gat bikpela haptaim i stap, man i gat savetingting bai mekim ol bikpela samting pastaim. Olsem: Sapos em i kisim save olsem bikpela win na ren i laik kam, em bai givim taim na strong bilong em long stretim rot long famili bilong em i no ken bagarap na em bai givim tok lukaut long ol neiba. Bihain em bai mekim ol samting i no bikpela samting. I no gat bikpela haptaim moa i stap paslain long Armagedon i kamap. (Sef. 1:14-16; 1 Ko. 7:29) Bilong God i ken kisim bek yumi na ol man i harim tok bilong yumi, oltaim yumi mas was gut long pasin bilong yumi na wok bilong yumi long skulim ol manmeri, maski em i insait o ausait long kongrigesen. (1 Ti. 4:16) Tru tumas, sapos wok autim tok i stap nambawan bikpela samting long yumi, yumi inap abrusim bagarap!