Ol Tok Bilong Tilim Ol Nius

Wastaua Ogas 1

“Yu ting ol man i nidim wanem samting bambai ol i ken i stap amamas? [Larim man i bekim tok. Ritim Matyu 5:⁠3.] Dispela em wanpela tasol bilong ol tok Jisas i mekim long pasin bilong stap amamas. Dispela stori i kamapim skul yumi kisim long Jisas long olsem wanem yumi inap i stap amamas tru.” Soim stori i kirap long pes 16.

Awake! Ogas

“Planti muvi long nau i stori long ol spirit nogut, ol glasman, na pasin sanguma. Yu ting ol spirit nogut i stap tru? [Larim man i bekim tok. Ritim 1 Korin 10:20.] Dispela stori i kamapim klia tok Baibel i mekim long ol spirit nogut, na olsem wanem yumi inap lukautim yumi yet na ol i no inap bagarapim yumi.” Soim stori i kirap long pes 20.

Wastaua Septemba 1

Stori long wanpela samting ol man long hap bilong yu i tingting planti long en. Bihain tok olsem: “Sampela taim yu bin tingting bilong wanem ol man i mekim ol kain pasin nogut? [Larim man i bekim tok.] Baibel i kamapim as na yumi inap wet long gutpela samting bai kamap bihain. [Ritim 2 Pita 3:13.] Dispela magasin i kamapim tok Baibel i mekim long as na pasin nogut i stap, na olsem wanem God bai pinisim.”

Awake! Septemba

“Yu ting ol mobail fon, E-meil, pasin bilong toktok wantaim ol narapela long rot bilong Intenet, na ol kain samting olsem, i bin mekim na ol man i no pilim olsem ol i stap wanpis o i mekim na dispela hevi i go bikpela? [Larim man i bekim tok.] I gat wanpela tok i helpim yumi long karim hevi bilong i stap wanpis. [Ritim Aposel 20:35.] Dispela magasin i kamapim sampela gutpela tok moa bilong Baibel i helpim ol man i gat dispela hevi.”