Oltaim Yumi Mas Redi Long Autim Tok
1. Olsem wanem yumi save ol disaipel bilong bipo ol i redi oltaim long autim tok?
1 Ol disaipel bilong bipo ol i givim bel tru long autim tok long olgeta man ol i bungim na “ol i no lusim” dispela wok. (Apo. 5:42) Yumi ken ting olsem taim ol i wokabaut i go long autim tok long ol haus, ol i no abrusim nating wanpela man long rot, ol i bin autim tok long ol tu. Na tu, ol i redi long autim tok maski ol i raun long maket bilong baim kaikai bihain long ol i autim tok pinis. Wankain olsem Jisas, oltaim ol i save redi long autim gutnius.—Mak 6:31-34.
2. Nem yumi holim i makim wanem samting?
2 Oltaim Yumi Mas Redi: Dispela nem yumi holim olsem Witnes Bilong Jehova, i no makim tasol ol samting yumi save mekim; em i kamapim klia yumi husat. (Ais. 43:10-12) Olsem na oltaim yumi mas redi long bekim tok long ol man i askim long ol samting yumi bilip na wet long en. (1 Pita 3:15) Olsem wanem? Yu save tingim sampela samting inap kamap na i opim rot long yu autim tok, na yu save tingim wanem tok yu bai mekim? Yu save karim ol buk na nius wantaim yu bambai yu ken givim long ol man i gat laik long harim tok? (Snd. 21:5) Yu save autim tok tasol long ol haus, o yu save autim tok tu long ol man long kain kain hap taim rot i op long yu mekim olsem?
3. Dispela tok autim tok long “ol pablik ples,” i makim wok bilong autim tok long wanem ol hap? Bilong wanem yumi mas autim tok long “ol pablik ples”?
3 Autim Tok Long Ol Pablik Ples: Aposel Pol i tok em i save autim tok long “ol pablik ples” na long ol haus. (Apo. 20:20) Olsem na dispela tok autim tok long “ol pablik ples,” i stret long yusim taim yumi stori long wok bilong autim tok long ples bilong putim kar, ol pak, na long ol ples bisnis. Tru, wok bilong autim tok long ol haus em i nambawan rot bilong yumi long bungim ol man na autim tok bilong Kingdom long ol. Tasol ol man bilong autim gutnius long taim bilong ol aposel, ol i autim tok long ol man, na i no long ol haus. Ol i mekim wok long olgeta kain rot bilong autim tok i tru—long ol pablik ples, long kain kain taim na ples, na long ol haus. Yumi tu i mas tingting long autim tok long ol man na bai yumi ken inapim tru wok bilong yumi long autim tok.—2 Tim. 4:5.