Bihainim Gutpela Tingting Long Taim Bilong Autim Tok
1. Bilong wanem yumi mas was gut taim yumi autim tok?
1 “Olsem ol sipsip namel long ol wulf,” ol wokman bilong God i wok long autim tok “namel long lain pipol i nogut na i kranki tru.” (Mat. 10:16; Fili. 2:15) Long nau, yumi save harim planti nius bilong pait insait long kantri, ol man i bung na mekim nogut long narapela, na pasin bilong kidnepim man. Dispela i soim olsem ol man nogut i “go nogut moa.” (2 Tim. 3:13) Wanem stiatok bilong Baibel i tokim yumi long ‘yumi mas was gut’ long taim bilong autim tok?—Mat. 10:16.
2. Long wanem kain taim em gutpela tingting long yumi mas lusim teritori na go autim tok long narapela hap?
2 Bihainim Gutpela Tingting: Sindaun 22:3 i strongim yumi long bihainim savetingting na abrusim hevi. Olsem na oltaim yumi mas was i stap! Ples em yumi ting i gutpela, sampela taim wantu senis inap kamap. Ating yu bai lukim polis i kam o ol manmeri i kirap bung bung long rot. Sampela taim, man bilong haus husat i gat gutpela pasin bai givim tok lukaut long yu. Gutpela yu no pulim taim na traim long lukim wanem samting i wok long kamap. Mobeta yu bihainim gutpela tingting na wantu lusim dispela hap na go long narapela teritori.—Snd. 17:14; Jon 8:59; 1 Tes. 4:11.
3. Olsem wanem stiatok i stap long Saveman 4:9 i stret wantaim wok autim tok bilong yumi?
3 Wok Wantaim: Saveman 4:9 i tok: “I no gutpela long man i stap wanpis.” Ating yu lain pinis long pasin bilong autim tok yu yet, tasol long dispela taim nau, yu ting i seif long yu mekim olsem yet? Ating long sampela hap, em i orait. Tasol long ol narapela hap, i no seif long wanpela sista o wanpela yangpela long autim tok long ol haus em wan, na moa yet taim san i go daun pinis. Planti pablisa i painimaut olsem i gutpela moa long yumi mas poroman wantaim narapela husat inap was long ol samting i wok long kamap. (Sav. 4:10, 12) Yumi mas was long olgeta wan wan husat i stap long grup bilong autim tok. Taim yu laik lusim teritori, kisim pasin bilong toksave long narapela paslain long yu go.
4. Olsem wanem yumi olgeta wan wan inap lukautim ol narapela insait long kongrigesen?
4 Ol elda i save ‘was long yumi oltaim,’ olsem na ol i gat wok long stiaim yumi long ol samting i stret long bihainim long hap yumi stap long en. (Hib. 13:17) Jehova bai blesim yumi sapos yumi daunim yumi yet na wok gut wantaim ol elda. (Mai. 6:8; 1 Kor. 10:12) Yumi olgeta wokman bilong God i ken amamas na mekim gut wok autim tok long teritori bilong yumi, na long wankain taim yumi mas was gut.