Ol 12-pela As na Yumi Autim Tok

Bilong wanem yumi save autim tok na stadi wantaim ol man long Baibel? Yu ting namba 1 as na yumi mekim olsem em bilong helpim ol man i gat gutpela bel long bihainim rot i go long laip? (Mat. 7:14) Maski dispela i stap fes long lista hapsait, dispela i no makim olsem em i namba 1 as na yumi autim tok. Long lista hapsait, yu ting wanem bilong ol i namba 1 bikpela as na yumi mekim wok autim tok?

1. Taim yumi autim tok, dispela i helpim man long kisim laip.—Jon 17:3.

2. Wok autim tok i givim tok lukaut long ol man nogut.—Ese. 3:18, 19.

3. Em i truim tok profet bilong Baibel.—Mat. 24:14.

4. Em i soim stretpela pasin bilong God. Olsem na no gat man inap tok Jehova i no givim rot long ol man nogut long tanim bel paslain long em i bagarapim ol.—Apo. 17:30, 31; 1 Tim. 2:3, 4.

5. Em i helpim yumi long inapim wok bilong yumi long helpim ol man long i go klostu long God, em blut bilong Jisas i baim bek ol.—Rom 1:14, 15.

6. Em i helpim yumi na yumi no gat asua long blut bilong man.—Apo. 20:26, 27.

7. Em wok yumi mas mekim bambai God i ken kisim bek yumi.—Ese. 3:19; Rom 10:9, 10.

8. Em i soim olsem yumi laikim ol arapela man.—Mat. 22:39.

9. Em i soim olsem yumi bihainim tok bilong Jehova na Pikinini bilong em.—Mat. 28:19, 20.

10. Em hap bilong wok lotu bilong yumi.—Hib. 13:15.

11. Em i soim olsem yumi laikim God.—1 Jon 5:3.

12. Em i helpim wok bilong mekim holi nem bilong Jehova.—Ais. 43:10-12; Mat. 6:9.

Tru, dispela tasol i no ol as na yumi insait long wok autim tok. Olsem, wok autim tok i strongim bilip bilong yumi, na i opim rot long yumi kamap wanwok bilong God. (1 Kor. 3:9) Tasol namba 1 as na yumi mekim wok autim tok em stap long poin namba 12. Maski ol man i harim tok o nogat, wok autim tok i helpim wok bilong mekim holi nem bilong God na dispela i bekim bilong Jehova long man i sutim tok long em. (Snd. 27:11) Tru tumas, i gat ol gutpela risen na yumi mas wok yet long “skulim ol manmeri na autim gutnius.”—Apo. 5:42.