Wok Bilong Mekim Baibel Stadi—Daunim Tingting Olsem Yu No Inap Mekim
1. Bilong wanem sampela i no laik toksave long man olsem yumi save mekim Baibel stadi wantaim ol man?
1 Olsem wanem? Ating yu no laik toksave long man olsem yumi save mekim Baibel stadi wantaim man, long wanem, yu ting yu no inap mekim gut Baibel stadi? Sampela taim ol gutpela wokman bilong God long bipo, olsem Moses na Jeremaia, ol tu i bin pilim olsem ol i no winim ol mak bilong mekim ol wok em God i givim long ol. (Kis. 3:10, 11; 4:10; Jer. 1:4-6) Olsem na planti i save pilim wankain. Tasol olsem wanem yumi inap daunim dispela kain tingting?
2. Bilong wanem yumi no ken ting yumi mas autim tok tasol long ol haus na larim wok bilong mekim Baibel stadi long ol narapela?
2 Yumi mas tingim olsem Jehova i no inap tokim yumi long mekim samting we i winim save bilong yumi. (Sng. 103:14) Jisas i givim wok long yumi long “kamapim ol disaipel” na “skulim ol” man, em wanpela wok yumi mas inapim gut. (Mat. 28:19, 20) Jehova i no makim tasol ol bratasista husat i save gut long mekim ol Baibel stadi bilong mekim dispela wok. (1 Kor. 1:26, 27) Olsem na yumi no ken ting yumi mas autim tok tasol long ol haus na yumi larim wok bilong mekim Baibel stadi long ol narapela, nogat.
3. Olsem wanem Jehova i mekim yumi i winim mak bilong mekim wok bilong Baibel stadi?
3 Jehova i Mekim Yumi i Winim Mak: Jehova yet inap mekim yumi i winim mak bilong mekim wok bilong kamapim disaipel. (2 Kor. 3:5) Long rot bilong oganaisesen bilong em, Jehova i skulim yumi long ol tok i tru bilong Baibel em ol saveman tru bilong dispela graun ol i no save long en. (1 Kor. 2:7, 8) Em i lukautim gut ol tok bilong Baibel i stori long pasin bilong Bikpela Tisa, Jisas, long skulim ol man bambai yumi ken bihainim, na em i wok yet long skulim yumi long rot bilong kongrigesen. Na tu, Jehova i no larim yumi i kamapim ol buk samting bilong yumi yet bilong skulim ol man long Baibel, nogat. Em i givim yumi ol tul, olsem buk Baibel i Tok, dispela buk i kamapim klia tok i tru long rot we i no hatwok long yumi inap kisim gut tok bilong en. Olsem na yumi no ken ting wok bilong mekim Baibel stadi em wok i gat hatwok long en, nogat.
4. Wanem as na yumi inap bilip olsem Jehova bai helpim yumi?
4 Jehova i bin helpim Moses na Jeremaia long inapim gut ol wok em i bin givim ol. (Kis. 4:11, 12; Jer. 1:7, 8) Yumi tu inap askim Jehova long helpim yumi. Taim yumi mekim Baibel stadi, yumi skulim man long tok i tru long Jehova em i husat, na dispela i gutpela samting long ai bilong em. (1 Jon 3:22) Olsem na putim mak long yu bai insait long wok bilong mekim Baibel stadi, em wanpela hap bilong wok autim tok yu bai amamas long en.