“Stap Wanbel Wantaim Olgeta Man”
1. Yumi mas bihainim wanem tok bilong Baibel taim yumi bungim man husat i no amamas?
1 Lain bilong Jehova ol i laik i stap wanbel wantaim ol narapela, na wok autim tok bilong yumi em wanpela rot bilong kamapim pasin wanbel. (Ais. 52:7) Tasol sampela taim yumi save bungim ol man husat i no amamas taim yumi go long haus bilong ol. Wanem samting bai helpim yumi long i stap bel isi long kain taim olsem?—Rom 12:18.
2. Bilong wanem em i bikpela samting long yumi mas holim stretpela tingting?
2 Holim Stretpela Tingting: Sampela i no laikim tok i tru na ol i kros long yumi, na sampela i kros, long wanem, ol i gat sampela hevi bilong ol yet. Ating yumi go long taim we i no gutpela long em. Na ating man bilong haus i gat sampela hevi bilong em yet na em i no amamas. Tasol sapos gutnius i mekim em i kros, orait yumi mas tingim olsem em i kros, long wanem, ating lotu i bin paulim tingting bilong em. (2 Kor. 4:4) Sapos yumi holim stretpela tingting, dispela bai helpim yumi long stap isi na yumi no bel hevi taim em i kros.—Snd. 19:11.
3. Olsem wanem yumi inap mekim pasin rispek long man bilong haus?
3 Mekim Pasin Rispek: Planti man long teritori i strong long bihainim ol bilip bilong ol. (2 Kor. 10:4) Ol i gat rait long makim olsem ol bai harim tok bilong yumi o nogat. Yumi no laik daunim bilip bilong man o givim tingting long em olsem yumi gat bikpela save long Baibel winim em. Sapos em i tokim yumi long lusim haus, long pasin rispek yumi mas bihainim tok bilong em.
4. Toktok long pasin isi, dispela i makim wanem samting?
4 Toktok Long Pasin Isi: Sapos man bilong haus i tok nogut long yumi, yumi mas bekim tok long pasin isi na long gutpela pasin. (Kol. 4:6; 1 Pita 2:23) No ken kirapim tok pait wantaim em, i gutpela long kamapim wanpela tok yutupela i wanbel long en. Ating long gutpela pasin yumi ken askim man bilong haus long as na em no amamas long yumi. Tasol bilong abrusim pasin bilong mekim em i kros moa yet, sampela taim i gutpela long yumi lusim em tasol.—Snd. 9:7; 17:14.
5. Wanem ol gutpela samting inap kamap taim yumi mekim pasin isi long taim yumi autim tok?
5 Sapos yumi mekim pasin isi, man bilong haus bai tingim pasin bilong yumi na narapela taim narapela Witnes i autim tok long em, em bai putim yau. (Rom 12:20, 21) Sampela taim i luk olsem man i birua tru long yumi, tasol bihain em i kamap brata bilong yumi. (Gal. 1:13, 14) Maski man i laikim tok i tru o nogat, yumi bai givim biknem long Jehova na long wok bilong yumi long skulim man sapos yumi bosim gut bel na mekim pasin wanbel.—2 Kor. 6:3.