Mekim Wok Autim Tok i Kamap Gutpela Moa—Hau Bai Yumi Bekim Tok Taim Man i Kros

Em i Bikpela Samting: Planti man yumi bungim ol long teritori ol i gat gutpela pasin. Tasol Jisas i tok profet olsem sampela man bai heitim yumi. (Jon 17:14) Olsem na yumi no ken kirap nogut taim man i kros long yumi. Sapos kain samting olsem i kamap, yumi laik bekim tok long pasin we i amamasim man em yumi mekim wok bilong en, em Jehova. (Rom 12:17-21; 1 Pita 3:15) Taim yumi mekim olsem, yumi pasim rot long hevi i go bikpela. Na tu, pasin bilong yu bai autim tok long man bilong haus na long ol narapela husat i lukim yu, olsem na narapela taim ol Witnes Bilong Jehova i kam ol bai harim tok.—2 Kor. 6:3.

Rot Bilong Mekim:

Stap isi na mekim pasin pren. Dispela bai mekim na hevi i no go bikpela. No ken kisim tingting olsem man i kros long yu. (Sav. 7:9) Ating em i no amamas, long wanem, em i gat hevi bilong em yet, o ating yu go long rong taim. Sapos em i kros long tok bilong yumi, planti taim dispela samting i save kamap, long wanem, em i bin harim ol tok giaman ol narapela i mekim long yumi.—2 Kor. 4:4.
Bekim tok isi na long gutpela pasin. (Snd. 15:1) Olsem wanem? Yu bin kirapim em taim em i slip o pasim em long wok samting? Tru yumi no tok sori long wok yumi mekim, tasol yumi mekim pasin daun na tok sori long em olsem yumi kam long rong taim. Olsem wanem? Em i kros, long wanem, em i harim ol tok giaman ol man i mekim long yumi? Sapos olsem, yu inap tok: “Ating mi save wai na yu no wanbel long dispela tok. Tasol ol tok yu harim ol man i mekim long mipela em i no stret. Inap mi stori gut long yu?” Olsem wanem? Em i no laikim wanpela bilip bilong yumi, olsem long pasin bilong rausim man long kongrigesen o long sakim blut? Yu ken tok: “Mi save. Ol narapela tu i gat wankain tingting. Inap mi soim yu long Baibel long as bilong dispela bilip?”
Sapos man i kros nogut tru, i gutpela long lusim em na no ken traim long bekim tok. Sapos em i tok olsem em i no laik bai ol Witnes Bilong Jehova i visitim em gen, yu ken tokim em olsem bai yumi bihainim tok bilong em.

Long Dispela Mun, Traim Dispela:

Mekim prektis long taim bilong famili lotu.
Taim yupela i lusim pinis man i kros, toktok wantaim poroman long ol gutpela pasin bilong bekim tok taim man i kros.