No Ken Pret Long Tokaut, Tasol Mekim Long Pasin Isi
1 Planti manmeri em yumi autim tok long ol, ol i save kamapim ol bilip i no stret wantaim ol tok i tru bilong Baibel. Tru, yumi mas strong long autim tok na no ken pret, tasol taim yumi mekim olsem, yumi laik “stap wanbel wantaim olgeta man” na abrusim pasin bilong skrapim bel bilong ol. (Ro. 12:18; Ap. 4:29) Olsem wanem yumi ken strong long autim tok bilong Kingdom na no ken pret, na mekim long pasin isi tu?
2 Toktok Long Samting Yupela i Wanbel Long En: Man i stap wanbel wantaim ol arapela, em i no save tok pait. Pasin bilong daunim ol bilip kranki bilong man bilong haus taim i no gat wok long mekim olsem, dispela i no inap kirapim em long putim yau long tok bilong yumi. Sapos em i kamapim wanpela tok kranki, ating long pasin isi yumi ken kamapim wanpela tok em i wanbel long en. Sapos yumi stori long samting em i wanbel long en, ating em bai pilim tru long bel na lusim ol kros em i gat long yumi.
3 Sapos man bilong haus i kamapim wanpela tingting kranki na yumi larim tasol, yu ting long dispela pasin yumi daunim strong bilong tok i tru? Nogat. Wok bilong yumi ol Kristen i no bilong daunim olgeta tingting kranki man i kamapim, nogat, wok bilong yumi i bilong autim gutnius bilong Kingdom Bilong God. (Mt. 24:14) Taim man i kamapim wanpela tingting kranki, no ken hariap long daunim, tingim dispela samting olsem rot bilong save long tingting bilong em.—Snd. 16:23.
4 Soim Rispek: Sampela taim yumi mas strongim bel na tokaut stret long ol bilip kranki. Tasol yumi laik stap wanbel wantaim olgeta man, olsem na yumi no ken tok bilas o givim nem nogut long ol man i holim ol bilip giaman na i skulim ol narapela long en. Sapos yumi mekim pasin olsem yumi antap long ol, dispela bai pasim tingting bilong ol. Tasol sapos yumi mekim tok long pasin daun na pasin isi, ating dispela bai kirapim ol man i laikim tok i tru long harim tok. Taim yumi soim rispek long ol man na ol bilip bilong ol, dispela inap mekim na nau ol i no hatwok long harim tok bilong yumi.
5 Aposel Pol i bin tingim bilip bilong ol man em i autim tok long ol na em i wok long kamapim gutnius long pasin ol bai pilim tru long bel. (Ap. 17:22-31) Em i bin amamas long “traim olgeta rot” na bai em i ken “kisim bek sampela.” (1 Ko. 9:22) Yumi tu i ken mekim olsem long rot bilong stap wanbel wantaim olgeta man taim yumi strong long autim gutnius.