Yu Redi Long Mekim Sampela Senis?
1. Ol samting long graun i wok long senis, olsem na yumi mas senisim wanem ol samting?
1 Long 1 Korin 7:31, Baibel i tok piksa olsem graun i olsem wanpela pletfom bilong mekim drama we ol wan wan hap bilong drama i senis senis na ol ekta i wok long senis senis long ol narapela narapela hap bilong drama. Ol samting long graun i wok long senis, olsem na yumi mas mekim sampela senis long ol rot bilong yumi long autim tok, sediul, na pasin bilong yumi long autim tok. Olsem wanem? Yu redi long mekim sampela senis?
2. Bilong wanem yumi mas mekim sampela senis bambai yumi wokabaut i go wantaim oganaisesen?
2 Ol Rot Bilong Autim Tok: Kirap long bipo yet na i kam inap long nau, kongrigesen Kristen i wok long senis. Long namba 1 taim Jisas i salim ol disaipel i go long autim tok, em i tokim ol long no ken kisim kaikai o kisim mani i go. (Mat. 10:9, 10) Tasol bihain em i senisim tok, bikos em i save bihain ol man bai birua long ol disaipel na wok bilong autim tok bai i go bikpela na i go long ol narapela hap. (Luk 22:36) Insait long 100 yia i go pinis, oganaisesen bilong Jehova i bin yusim narapela narapela rot bilong autim tok—olsem ol kat i gat sampela tok bilong Baibel long en, redio, na ol kar i gat ol bikpela spika—em ol samting ol i mas yusim long dispela taim bipo. Long nau, long planti hap ol man i no save stap long haus taim yumi autim tok, olsem na yumi mas autim tok tu long ol pablik ples na long kain kain taim na ples. Na tu, yumi mas autim tok long ol apinun sapos ol man i bin stap long ples wok na ol i no stap long haus long san. Karis bilong Jehova i save senisim senisim ron bilong en, na olsem wanem long yu, yu wokabaut i go wantaim dispela karis?—Ese. 1:20, 21.
3. Olsem wanem pasin bilong senisim tok bai helpim yumi long mekim gutpela wok long teritori?
3 Samting Yu Stori Long En: Ol manmeri long hap bilong yu ol i tingting planti long wanem ol samting long nau? Samting bilong mani? Famili? Woa? Sapos yumi save long ol hevi na ol samting em planti man long teritori i tingting planti long en, dispela inap helpim yumi long redim tok i stret bilong stori long en. (1 Kor. 9:20-23) Taim man i kamapim tingting bilong em, yumi no ken kamapim bekim em yumi ting i stret na stori yet long samting em yumi bin redim pinis. I gutpela moa long senisim tok na stori long samting em man i tingting long en.
4. Bilong wanem yumi mas hariap long mekim sampela senis nau?
4 Klostu nau taim bilong “ol samting” i wok long kamap long graun em bai pinis na bikpela hevi tru bai kirap. “Taim i sot pinis.” (1 Kor. 7:29) Olsem na em i bikpela samting long mekim sampela senis nau, na bai yumi inap mekim bikpela wok moa insait long dispela liklik hap taim i stap yet!