Rot Bilong Autim Tok

Bilong Kirapim Baibel Stadi Long Namba 1 Sarere Bilong Mas

“Mipela i raun na stori liklik wantaim ol man long wanpela samting bai kamap long Epril 14. Dispela de em Memorial bilong tingim indai bilong Jisas. Sampela bai mekim dispela bung, long wanem, ol i tingim olsem dai bilong em i bikpela samting. Na sampela i no save wai na dai bilong Jisas i bikpela samting. Yu ting dai bilong Jisas i helpim yu na mi?” Larim man i bekim tok. Soim em laspela pes bilong Wastaua bilong Mas 1, na stori wantaim em long ol tok i stap aninit long namba 1 askim na ritim wanpela skripsa. Tilim magasin na stretim rot bilong go bek na stori long namba 2 askim.

Wastaua Mas 1

“Planti man i laik save long as na God i no pinisim hariap ol pasin i no stret na pen na hevi. Yu ting dispela i as long wanem God i no tingim yumi? O yu ting em i amamas long ol man i karim pen na hevi? [Larim man i bekim tok. Nau ritim Jon 3:16.] Planti man i save kolim tok bilong dispela skripsa bilong kamapim olsem God i save tingim yumi, tasol ol i no save olsem wanem dai bilong Pikinini bilong God i helpim ol. Dispela nius i stori gut long hau dai bilong Jisas i opim rot long God i pinisim pasin i no stret na pen na hevi long graun.”

Kirap! Mas

“Mipela i raun na stori liklik wantaim ol man long dispela tok bilong Baibel em planti man i gat tingting kranki long en. [Ritim Stat 1:1.] Sampela i bilip olsem God i wokim olgeta samting long ples antap na graun, tasol sampela i no ting olsem. Tasol yu gat wanem tingting? [Larim man i bekim tok.] Planti i no laik bilip olsem i gat wanpela man i wokim ol samting, long wanem, ol bikman bilong lotu i skulim ol long ol samting em Baibel i no as bilong en. Dispela nius i kamapim stretpela save bilong Baibel na i stori gut long olsem wanem ol samting bilong ples antap na graun i stat long kamap.”