Helpim Ol Lain i No Save Long Rit

1. Bilong lainim ol man i no save long rit long ol tok bilong Baibel i gat wanem hatwok?

¹ Ol man bilong haus husat i no save long rit, ating ol i gat laik long kisim save long God, tasol taim ol i lukim Baibel na ol narapela buk, dispela i pretim ol. Olsem na ating em bai hatwok liklik long tilim buk Baibel i Tok long ol. Olsem wanem yumi inap helpim ol long kisim save long God? Mipela i bin askim sampela pablisa bilong 20 narapela narapela kantri long olsem wanem ol i bin mekim gut dispela wok. Ol i kamapim sampela tingting i stap daunbilo.

2. Wanem ol tul i gutpela long yusim bilong helpim ol man i no save gut long rit o i no save long rit?

² Sapos sumatin i no save gut long rit o em i no save long rit, yu ken kirapim stadi long wanpela buklet, olsem Harim Tok Bilong God o Harim Tok Bilong God na Stap Oltaim. Wanpela painia long Amerika i save soim tupela buklet wantaim long man na askim man long wanem buklet em i laikim. Brens ofis bilong Kenya i tok ol dispela tul i bin kamapim gutpela samting, long wanem, long Afrika em pasin bilong ples long ol man i save stori tasol na i no gat pasin bilong givim askim na ol i bekim. Ol man i bin skul gut em i isi long ol i rit na givim askim, tasol long ol man i no save rit gut o i no save long rit ol bai pilim nogut long pasin bilong askim. Sapos sumatin i save liklik long rit, planti pablisa i save kirapim stadi long buklet Gutpela Nius i Kam Long God! o Yu Inap i Stap Pren Bilong God! o buk Baibel Stori Buk Bilong Mi.

3. Yumi mas tingim wanem samting bilong ol man i no save long rit na dispela i helpim yumi long skulim gut ol?

³ Tok Amamas: Ol man i no save long rit ol save sem, na planti bilong ol i ting ol i no gat save. Olsem na namba 1 samting bilong helpim ol long kisim save long tok i tru, em long helpim ol na ol i no ken pret o sem. Planti man i no save long rit ol i smat na ol inap long lain. Soim rispek long ol, na mekim pasin i soim olsem yu tingim ol olsem man o meri i gat nem. (1 Pita 3:15) Sapos ol i save olsem hatwok bilong ol bai kamapim gutpela samting na ol i wok long kamap strong, dispela bai kirapim ol long wok strong long stadi. Olsem na mekim gutpela pasin na tok amamas long ol.

4. Olsem wanem yumi ken kirapim ol man i no save long rit o i no save gut long rit long redim stadi?

⁴ Maski sapos sumatin i no save gut long rit o em i no save long rit, strongim em long redim stadi bilong em. Sampela pablisa long Saut Afrika i save kirapim ol sumatin long askim ol famili o pren bilong ol husat i save long rit long helpim ol. Bilong kirapim sumatin bilong em long redim stadi, wanpela pablisa long Briten i save larim sumatin i yusim buk bilong em i gat mak pinis long en taim tupela i stadi na bai sumatin i ken luksave olsem em i isi long painim kwik bekim taim em i makim. Wanpela brata long India i save kirapim sumatin bilong em long lukim ol piksa bilong lesen em ol bai stadi long en long wik bihain na wokim tingting long ol dispela piksa paslain long stadi.

5. Olsem wanem yumi inap mekim pasin bilong i no les kwik taim yumi mekim Baibel stadi?

⁵ No Ken Les Kwik: Maski yumi yusim wanem buklet, wok strong long kamapim ol bikpela poin, na helpim sumatin long kliagut long ol dispela poin. Pastaim, ating i gutpela long mekim sotpela stadi tasol inap 10 o 15 minit. No ken traim long stori long planti samting, ating tupela o tripela paragraf em inap. No ken les kwik sapos sumatin i rit isi isi. Ating pasin bilong em long rit bai kamap gutpela moa taim em i wok long kisim pasin bilong laikim Jehova. Bilong helpim sumatin bilong yu long mekim olsem, taim yu kirapim stadi wantaim em long namba 1 taim, i gutpela long singautim em i kam long ol miting.

6. Olsem wanem yumi inap helpim man long lain long rit?

⁶ Sapos ol Baibel sumatin i lain long rit, ol bai wok long kamap strong hariap. (Sng. 1:1-3) Planti i bin yusim buklet Wok Strong Long Lain Long Rit na Rait long helpim ol sumatin bilong ol inap sampela minit bihain long olgeta wan wan stadi. Sapos sumatin i bel hevi, yu ken strongim bel bilong em na tokim em long ol samting em i bin mekim gut pinis. Strongim em olsem Jehova bai blesim hatwok em i mekim na kirapim em long beten long God i helpim em. (Snd. 16:3; 1 Jon 5:14, 15) Sampela pablisa long Briten i bin kirapim ol sumatin long putim ol mak we inap helpim ol long wok yet long lain gut long rit—ating pastaim ol i lain long kolim ABC, bihain painim na makim ol skripsa na ritim, na bihain ritim ol buk samting bilong Baibel we i isi long ol i ritim. Bilong helpim ol man long rit, yumi mas kirapim laik bilong ol long mekim, yumi no skulim ol tasol.

7. Bilong wanem yumi no ken surik long autim tok long ol man i no save gut long rit o i no save long rit?

⁷ Jehova i no save luk daun long ol man i no bin skul gut. (Jop 34:19) Em i save lukim ol samting i stap insait long bel bilong man. (1 Sto. 28:9) Olsem na no ken surik long autim tok i tru long ol man i no save gut long rit o i no save long rit. I gat planti gutpela tul bilong helpim yu long mekim dispela wok. Bihain, ating yu ken senisim stadi i go long buk Baibel i Tok na helpim em long kliagut moa long ol tok bilong Baibel.