Skulim Ol Man Husat i No Save Gut Long Rit
1. Yumi inap bungim wanem kain man long taim bilong autim tok?
1 Long taim yumi autim tok, ating sampela taim yumi bai bungim sampela man husat i no save gut long rit o i no save liklik long rit. Bai yumi mekim wanem?
2. Olsem wanem yumi ken soim rispek long ol man i no save liklik long rit, na ol man i no save gut long rit? Bilong wanem yumi mekim olsem?
2 Soim Rispek Long Ol: Jehova i save skelim bel bilong man, i no ediukesen bilong em. (1 Sml. 16:7; Snd. 21:2) Olsem na yumi no ken luk daun long ol man husat i no save liklik long rit, o ol i no save gut long rit. Ating long pastaim ol bai sem long tokaut long hevi bilong ol long rit. Tasol sapos yumi soim rispek long kain man olsem na yumi no gat pasin bilong les kwik, em bai amamas long yumi helpim em. (1 Pi. 3:15) Bai yumi no subim ol long ritim wanpela skripsa o wanpela paragraf. Isi isi taim man i wok long lainim ol gutpela tok i tru bilong Baibel, ating bai em i laik tru long lain long pasin bilong rit o lain long rit gut bambai em inap kisim amamas long ritim Tok Bilong God.—Sng. 1:2, 3.
3. Yu ken yusim wanem ol samting bilong skulim man i no save gut long rit, o man i no save liklik long rit?
3 Pasin Bilong Skulim Ol Baibel Stadi: Ol piksa i gutpela tul long helpim yumi skulim ol man na helpim ol long tingim yet ol samting ol i bin lainim. Ating yu ken askim sumatin long em i lukim wanem samting long piksa i stap long buk. Orait, tromoi ol askim i stret bilong helpim em long kliagut long samting piksa i laik kamapim. Mekim wok long ol skripsa i kamapim sampela poin bilong dispela piksa. Yu ken yusim ol piksa long mekim riviu long ol samting em i lainim long stadi. No ken stori long planti samting long wanpela taim tasol. Kamapim klia astingting bilong stadi, ol bikpela poin, na no ken stori long ol narapela poin i no insait long dispela stadi. Ritim stret ol skripsa long Baibel, na mekim ol askim bilong save sumatin i kliagut long tok yu ritim o nogat. Ating dispela bai kirapim laik bilong em long lain long rit o rit gut bambai em yet inap kisim sampela save moa long tok i tru bilong Baibel.
4. Olsem wanem yumi inap helpim ol sumatin bilong yumi long lain long rit o helpim ol long save gut long rit?
4 Ol Rot Bilong Helpim Sumatin Long Rit Gut: Ol man husat i no save liklik long rit o i no bin lain long rit gut, ating ol inap kisimgut ol tok na putim gut long tingting. Yu inap kirapim kain lain olsem long mekim wok long ol kaset na CD bilong ol buk bilong yumi. Kirapim em long putim gut yau taim man i ritim tok i stap long buk samting long dispela kaset o CD na em i ken bihainim na kolim ol wed man i ritim, na dispela bai helpim em long rit gut. Buklet Wok Strong Long Lain Long Rit na Rait bai helpim em gut. Long sampela hap, ating ol elda i ken kirapim wanpela skul bilong rit long kongrigesen. Ol dispela rot i ken helpim yumi long helpim ol man husat i no save gut long rit bambai ol i ken kliagut long “tok bilong God,” na dispela inap helpim ol long bihainim gutpela tingting na bai God i ken kisim bek ol.—2 Ti. 3:15.