Go Lukim Ol Kwiktaim

Kirap long taim yumi gat Intenet Web-sait, namba bilong ol man i askim long ol i laik stadi long Baibel em i go bikpela tru. Na tu, long rot bilong nupela pasin bilong autim tok long ol pablik ples, planti man moa i askim long ol i laik stadi long Baibel. Brens ofis i save stretim kwik dispela na toksave long ol kongrigesen. Olsem: Sapos wanpela i putim toksave long jw.org Web-sait olsem em i laik stadi long Baibel, ol elda i stap long hap dispela man i sindaun long en bai kisim toksave i kam long brens ofis insait long 2-pela de bihain. Mipela i kisim toksave olsem, sampela i bin askim long Baibel stadi, tasol i no gat wanpela pablisa i go lukim ol inap sampela wik. Yumi inap mekim wanem bilong strongim ol dispela lain na bai dispela laik bilong ol long kisim save long Baibel i no ken pinis?​—Mak 4:14, 15.

Sapos man i laik harim tok i no stap long teritori bilong yu, orait kwiktaim raitim dispela fom Plis Go Lukim (S-43-MP) na givim long kuskus taim yu go long miting. Insait long wanpela o tupela de, kuskus i mas givim dispela toksave long kongrigesen i stret long hap man i sindaun long en o salim long brens ofis long rot bilong yusim Congregation tab long jw.org. Ol elda i mas sekim Web-sait long olgeta taim. Sapos ol i kisim toksave olsem ol i mas i go lukim wanpela man, orait kwiktaim ol i mas stretim rot long go lukim dispela man. Pablisa em ol elda i askim em long go lukim dispela man, em i mas tingim olsem wok bilong go lukim dispela man em i wanpela bikpela wok. Sapos dispela man i no stap long haus, ating yu ken lusim wanpela liklik toksave na fon namba bilong yu.