Askim​—⁠1

◼ Husat i mas pulimapim fom long magasin na long Intenet?

Ol nius bilong yumi i gat fom we man i ken pulimapim na salim i go long brens ofis bilong askim long kisim buk samting o askim long wanpela Witnes i go lukim em. Na tu, man i ken pulimapim fom i stap long Web-sait www.watchtower.org bilong askim long wanpela Witnes i kam stadi wantaim em long Baibel. Ol dispela tul i helpim planti manmeri long kisim save long tok i tru. Tasol hevi i bin kamap taim ol pablisa yet i bin pulapim fom bilong stretim rot long wanblut bilong ol o ol narapela long kisim buk samting o askim long wanpela Witnes i kam stadi wantaim ol.

Sampela em ol i no bin askim long kisim ol buk na nius tasol brens ofis i salim long ol, ol i komplein na tok olsem oganaisesen bilong yumi i putim hevi long ol taim ol i salim ol buk na nius long ol. Ol pablisa husat i bin kisim toksave bilong go lukim man husat i no bin askim long ol Witnes i kam lukim em, ol dispela pablisa i kisim hevi long dispela man i kros long ol. Olsem na taim man i laik kisim buk samting o em i laik bai wanpela Witnes i go lukim em, dispela man yet i mas pulimapim dispela fom long nius o long Web-sait, na ol pablisa i no ken mekim. Sapos brens ofis i kisim save olsem wanpela pablisa i bin pulimapim dispela fom, long wanem, em i laik bai ol i salim buk samting o em i laik bai wanpela Witnes i go lukim wanblut bilong em, orait brens ofis bai i no inap mekim wanpela samting.

Olsem wanem yumi ken helpim wanpela wanblut o wanpela pren long kisim save long tok i tru? Yu yet i ken salim buk o nius i go long em olsem presen. Sapos em i laik bai wanpela Witnes i go lukim em, tasol yu no save long olsem wanem bai yu toksave long ol elda bilong kongrigesen long hap em i stap long en, orait yu ken pulimapim fom Plis Go Lukim (S-43-MP) na givim long kuskus bilong kongrigesen bilong yu na em bai skelim na salim i go long brens ofis. Tasol sapos dispela man i stap long kalabus, o klinik bilong ol man i gat hevi long dring o  kisim drak, orait yu no ken askim brens ofis long salim wanpela i go lukim em. I gutpela long yu kirapim em long i go bungim ol brata husat i save go long ol kain ples olsem bilong autim tok, o tokim em long em yet i ken raitim pas long brens ofis.