Askim

◼ I stret long ol pablisa i yusim Intenet long autim tok o stadi wantaim wanpela man ol i no save long en husat i stap long narapela kantri?

Sampela pablisa i yusim Intenet long painim Baibel stadi long ol kantri we gavman i tambuim wok bilong autim tok o i no gat planti pablisa. Sampela taim, gutpela samting i save kamap. Tasol samting nogut inap kamap taim ol pablisa i salim e-mail i go i kam o toktok wantaim ol man ol i no save long ol long rot bilong Intenet. (Lukim Wok Kingdom bilong Julai 2007, p. 7.) Ating ol i laik helpim ol man i gat gutpela bel long harim tok bilong Kingdom, tasol dispela kain pasin bilong toktok wantaim ol inap pulim brata o sista long bungim ol poroman nogut, na tu, ol apostet. (1 Kor. 1:19-25; Kol. 2:8) Na tu, long ol kantri we gavman i tambuim wok bilong Kingdom, ol bikman bilong gavman inap skelim ol pas o e-mail em ol i salim i go i kam. Sapos ol i painimaut dispela bai putim hevi long ol brata na sista bilong dispela kantri. Olsem na, ol pablisa i no ken yusim Intenet long painim ol man bilong narapela kantri bilong autim gutnius long ol.

Brens ofis bilong dispela kantri i save lukautim wok autim tok, olsem na sapos yumi autim tok long wanpela man bilong narapela kantri long kain kain taim na ples, yumi no ken traim long kirapim laik bilong em long kisim sampela save moa taim em i go bek long ples bilong em. I gutpela moa long soim em jw.org Web-sait na stori long hau em i ken yusim bilong kisim sampela save moa o kontektim brens ofis long kantri bilong em. Na tu, yumi ken kirapim em long go long Haus Kingdom i stap klostu long ples bilong em. Tru, long sampela kantri i no gat ol Haus Kingdom. Sapos em i laik bai ol Witnes i kam lukim em long kantri bilong em, yumi mas pulapim fom Plis Go Lukim (S-43-MP) na givim long kuskus na em bai salim long rot bilong jw.org Web-sait. Brens ofis i save lukautim wok bilong kantri bilong dispela man ol i save long kain samting olsem long hap, olsem na ol bai amamas long helpim em long kisim save long God.—Lukim Wok Kingdom bilong Jun, 2014, p. 5, na Wok Kingdom bilong Novemba 2011, p. 2.

Sapos man em nau yumi wok long go lukim em i muv i go long narapela kantri o sapos nau yumi wok long stadi wantaim wanpela man bilong narapela kantri long rot bilong Intenet, orait yumi mas bihainim dispela tok i stap antap. Tasol, yumi ken wok yet long kirapim em long amamas yet long harim tok inap long wanpela pablisa long hap bilong em i go lukim em. Na tu, sapos em i stap long kantri we gavman i putim tambu long wok bilong yumi o pasim wok, yumi mas was gut taim yumi stori wantaim ol long ol tok bilong Baibel long rot bilong pas, telefon, e-mail, o Intenet.—Mat. 10:16.