Redi Gut Long Mekim Wok Tisa

Inap 2-pela taim ol man i askim Jisas long ol i mas mekim wanem bilong kisim laip oltaim. Taim Jisas i bekim askim bilong ol, em i yusim ol tok i stret long save bilong ol. (Luk 10:25-28; 18:18-20) Maski yumi save gut long ol tok i stap long buk bilong mekim Baibel stadi, yumi mas tingim sumatin na redi gut. Yumi ken tingim ol dispela askim: Em bai hatwok long kliagut na bilipim wanem ol tok? Yumi mas ritim wanem ol skripsa wantaim em? Yumi mas skelim hamas paragraf? Yumi ken redim wanpela tok piksa, na sotpela stori bilong kamapim klia mining bilong tok, na sampela askim bilong helpim sumatin long kisim gut ol tok yumi bai stadi long en. Jehova tasol i save kirapim man long pilim tok i tru, olsem na yumi mas askim Jehova long blesim sumatin, na blesim hatwok bilong yumi long redim stadi na helpim sumatin long kamap strong long bilip.—1 Kor. 3:6; Jems 1:5.