Skul Yumi Kisim Long God Long Rot Bilong Ol Profet
Long bipo, God i givim ol bikpela tok long ol profet bilong em bilong givim long ol man. Yu ting ol dispela tok inap helpim yumi long save long rot bilong kisim blesing bilong God? Yes, ol inap helpim yumi. Yumi ken skelim skul yumi inap kisim long tripela gutpela profet.
ABRAHAM
God i save mekim wankain pasin long olgeta man na em i laik blesim ol.
God i tok promis long Abraham olsem “long rot bilong yu olgeta lain man bilong graun bai kisim blesing.”—Stat 12:3.
MOSES
Yumi kisim wanem skul? God i laikim tru yumi na em i laik blesim olgeta famili—ol man, meri, na ol pikinini—husat i bihainim tok bilong em.
God i save marimari na blesim ol manmeri husat i wok strong long save long em.
God i Gat Olgeta Strong i givim strong long Moses long wokim ol bikpela mirakel. Tasol Moses i beten: “Skulim mi long pasin bilong yu, na bai mi ken save gut long yu na oltaim yu ken amamas long mi.” (Kisim Bek 33:13) God i amamas long askim bilong Moses na givim em save na em i kliagut long ol pasin bilong Em. Olsem, Moses i kisim save olsem Krieta em “God i gat pasin marimari na pasin sori.”—Kisim Bek 34:6, 7.
Yumi kisim wanem skul? God i laik blesim yumi olgeta—ol man, meri, na ol pikinini—sapos yumi wok strong long save gut long em. Long Ol Skripsa Holi em i soim yumi long pasin bilong lotuim em na em i laik tru long blesim yumi.
JISAS
Jisas i sori tru long ol man i gat kain kain sik na oraitim ol
Yumi inap amamas long ol blesing bilong oltaim oltaim em God i givim sapos yumi kisim save long Jisas na ol samting em i mekim na ol tok em i skulim ol man.
Tok Bilong God i gat planti stori long laip bilong Jisas na ol tok em i skulim ol man long en. God i givim strong long Jisas bilong mekim ol strongpela mirakel, olsem oraitim ol aipas, yaupas, na lek nogut. Na tu, em i kirapim bek ol daiman. Olsem na Jisas i kamapim klia ol blesing em God bai givim long ol man long bihain. Em i tokim yumi long hau yumi wan wan inap amamas long ol dispela blesing: “Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—Jon 17:3.
Jisas i gat pasin sori, pasin isi, na gutpela pasin. Ol man na meri, yangpela na lapun, olgeta i harim singaut bilong em na kam long em: “Kisim skul long mi, long wanem, mi man bilong pasin isi na pasin daun, na yupela bai kisim nupela strong.” (Matyu 11:29) Jisas i no olsem ol man long taim bilong em we ol i mekim nogut long ol meri, nogat, em i mekim gutpela pasin long ol meri, givim biknem long ol, na rispektim ol.
Yumi kisim wanem skul? Jisas i soim olsem em i laikim ol manmeri, na em i stap gutpela piksa long pasin yumi mas mekim long narapela narapela.
JISAS I NO GOD
Ol Skripsa Holi i skulim yumi olsem “yumi gat wanpela God” tasol na Jisas Krais em wokman bilong God na em i gat pasin daun. (1 Korin 8:6) Jisas i tok klia olsem God i winim em na God i bin salim em i kam long graun.—Jon 11:41, 42; 14:28.a