BIHAINIM PASIN KRISTEN
Wok Bung Wantaim Long Autim Tok Long Teritori We Ol Man i Mekim Kain Kain Tokples
Planti taim ol manmeri i save amamas long harim tok bilong Kingdom taim yumi autim tok long ol long tokples bilong ol. Ating dispela i as na long Pentikos bilong yia 33 C.E., Jehova i stretim rot na bai sampela Juda em “ol i man bilong pret long God, na ol i kam long olgeta kantri” i ken harim gutnius long “tokples” bilong ol yet, maski ol inap mekim tokples Hibru o tokples Grik. (Ap 2:5, 8) Nau long planti hap we ol manmeri i save mekim kain kain tokples, i gat ol kongrigesen i save mekim miting long ol narapela narapela tokples na ol i save autim tok long seim teritori. Olsem wanem ol pablisa long ol kain kongrigesen i ken wok bung wantaim na bai ol i ken autim tok na ol i no ken mekim seim teritori klostu klostu o planti taim na dispela inap mekim ol man bilong haus i kros?
Toktok gut wantaim (Pr 15:22): Ol wasman autim tok i mas toktok gut wantaim na skelim gut olsem wanem olgeta kongrigesen inap mekim gut wok bilong autim tok. Sapos teritori bilong ol arapela kongrigesen i no bikpela, ol bai laik long kongrigesen bilong yupela i no ken autim tok long ol manmeri i save mekim tokples bilong kongrigesen bilong ol. Tasol sapos ol i no inap long autim tok olgeta taim long olgeta hap bilong teritori bilong ol long wanem teritori bilong ol i bikpela tru, ol bai laik long yupela i autim tok long olgeta haus, tasol yupela i ken toksave long ol sapos sampela long dispela teritori i gat laik long harim tok. (od-E 93 par. 37) O ol inap askim kongrigesen bilong yupela long helpim ol long painim ol manmeri i save mekim tokples bilong kongrigesen bilong ol na bihain yupela i ken givim atres bilong ol dispela lain long ol. (km 7/12 5, blok) Tingim olsem sampela taim long seim haus ol i save mekim narapela narapela tokples. Ol samting yumi mekim bilong kisim atres bilong ol man i mas stret wantaim ol lo bilong kantri.
Wok Bung Wantaim (Ef 4:16): Yupela i mas bihainim gut toksave em wasman autim tok i givim. Olsem wanem? Yu mekim Baibel stadi wantaim wanpela em tokples em i kliagut long en i no tokples bilong kongrigesen bilong yu? Sumatin bai kamap strong hariap sapos yu larim narapela long kongrigesen o grup i save mekim tokples bilong em i stadi wantaim em.
Redi gut (Pr 15:28; 16:1): Sapos man bilong haus long teritori bilong yupela i save mekim narapela tokples, yu ken autim tok yet long em. Yu ken mekim olsem long rot bilong painimaut wanem tokples ol man long teritori bilong yupela i save mekim na yu ken daunlodim ol Baibel na ol vidio long ol dispela tokples long fon bilong yu. Yu ken yusim tu JW Language aplikesen long lainim tok gude bilong sampela tokples.