LAIP STORI
“Nau Mi Laikim Tru Wok Autim Tok!”
MI KAMAP bikpela long kantri taun bilong Balclutha, em stap long South Island bilong Nu Silan. Taim mi liklik yet, mi pas gut wantaim Jehova na mi laikim tok i tru. Mi save amamas long go long ol miting, na kongrigesen em ples we mi pilim seif na mi stap amamas long en. Mi meri bilong sem, tasol mi save amamas long autim tok long olgeta wik. Mi no pret long autim tok long ol wanskul na ol narapela. Mi amamas long stap olsem wanpela Witnes Bilong Jehova, na taim mi gat 11-pela krismas, mi dediketim laip bilong mi long God.
MI LUSIM AMAMAS BILONG MI
Tasol sori tru, taim mi kamap tineja mi no pas gut moa wantaim Jehova. Mi lukim olsem ol wanskul bilong mi ol i gat bikpela fridom, na mi pilim olsem mi mis aut long sampela samting. Mi pilim olsem ol lo bilong papamama na ol lo Kristen i putim planti hevi long mi, na mi pilim olsem ol wok lotu i givim mi planti hatwok. Mi save olsem Jehova i stap tru, tasol mi no pilim olsem mi pas gut moa wantaim em.
Mi no laik kamap olsem wanpela husat i lusim wok autim tok, olsem na mi givim hap bel tasol long mekim wok bilong Jehova. Taim mi save go autim tok, mi no redi gut so i hatwok long mi autim tok. Olsem na mi no gat Baibel stadi o gobek na dispela i mekim na mi no amamas moa na mi no laikim wok autim tok. Mi save askim mi yet olsem, ‘Hau na wanpela inap mekim dispela wok long olgeta wik na long olgeta mun?’
Taim mi gat 17 krismas, mi laik mekim samting long laik bilong mi yet. So mi pekim kago bilong mi, lusim haus, na go long Australia. Papamama i bel hevi long lukim mi i go. Ol i tingting planti, tasol ol i ting olsem mi bai insait yet long ol wok lotu.
Long Australia, mi no givim bel olgeta long mekim ol wok lotu. Mi save go wan wan taim tasol long ol miting. Mi pas gut moa wantaim ol yangpela wankain olsem mi, ol i amamas long go long ol miting sampela taim, tasol ol narapela taim ol i go dring bia na danis long ol nait klap. Taim mi tingim bek, i olsem wanpela lek i stap insait long tok i tru na narapela lek i stap ausait long dispela graun, tasol mi pilim olsem mi no insait long wanpela bilong tupela, i olsem mi hangamap nating.
WANPELA BIKPELA LESEN MI NO TING LONG EN
Tupela yia bihain, mi bungim wanpela sista, pasin bilong em i mekim na mi skelim gen ol samting long laip bilong mi. Mi stap long wanpela haus wantaim 5-pela singel sista, na mipela i singautim wasman sekit na meri bilong em, Tamara, long kam stap wantaim mipela inap wanpela wik. Taim man bilong em i go long mekim ol wok bilong kongrigesen, Tamara i lusim taim long stap wantaim mipela ol gels na mipela i wok long lap wantaim. Mi laikim dispela pasin bilong em. Em i gat pasin daun tru na isi long toktok wantaim em. Mi lukim olsem maski em i givim bel tru long mekim wok bilong Jehova, em i gat ol gutpela pasin we i mekim na mi amamas long stap wantaim em.
Tamara i amamas tru long mekim wok bilong Jehova. Mi laikim tru pasin bilong em long laikim tru tok i tru na wok autim tok. Em i amamas long givim bes bilong em long mekim wok bilong Jehova, na mi bel hevi bikos mi givim hap bel tasol. Em i belgut na amamas long mekim wok na dispela i senisim tru tingting bilong mi. Eksampel bilong em i kirapim mi long tingim wanpela bikpela tok i tru bilong Baibel: Jehova i laik bai yumi mas “amamas” na lotu long em na “singim song bilong amamas” long em.—Sng. 100:2.
STRONGIM GEN LAIKIM BILONG MI LONG WOK AUTIM TOK
Mi laik kisim wankain amamas em Tamara i kisim, tasol bilong kisim dispela amamas mi mas mekim sampela bikpela senis. Sampela haptaim i lus, tasol isi isi mi mekim ol senis. Mi save redim gut wok autim tok na sampela taim mi save mekim wok painia haptaim. Dispela i helpim mi long daunim pret na strongim bel. Mi wok long yusim Baibel planti taim moa long wok autim tok, na dispela i mekim na mi amamas moa long wok autim tok. I no longtaim na mi mekim wok painia haptaim long olgeta mun.
Mi kirap long pas gut wantaim ol pren em ol i gat kain kain krismas na ol i stap gut long tok i tru na ol i amamas long mekim wok bilong Jehova. Gutpela eksampel bilong ol i helpim mi long skelim gen ol bikpela samting long i stap bilong mi na i helpim mi long stat long ritim Baibel long olgeta de. Nau mi amamas tru long mekim wok autim tok, so mi stat long mekim wok painia oltaim. Em festaim tru insait long planti yia we mi pilim olsem mi stap amamas tru na mi stap gut insait long kongrigesen.
MI KISIM WANPELA GUTPELA PAINIA POROMAN
Wanpela yia bihain mi bungim Alex, em i gat gutpela pasin na em i laikim tru Jehova na wok autim tok. Em i mekim wok olsem wanpela kongrigesen sevan na em i bin mekim wok painia inap olsem 6-pela yia pinis. Inap sampela mun Alex i bin helpim wok autim tok long Malawi, em hap i sot long ol man bilong wok autim tok. Long Malawi, em i bin wok wantaim ol misineri em ol i stap gutpela eksampel long em, na ol i strongim em long putim wok bilong Kingdom i stap nambawan bikpela samting long laip bilong em.
Long 2003, mitupela Alex i marit na mipela i stap yet insait long fultaim sevis i kam inap long nau. Mipela i lainim planti gutpela samting na Jehova i blesim mipela long planti rot.
MIPELA I KISIM PLANTI MOA BLESING
Mipela i mekim wok autim tok long Gleno, Timo-Leste
Long 2009, ol i singautim mipela long go mekim wok misineri long Timo-Leste, em wanpela liklik kantri long ol ailan bilong Indonesia. Mipela i kirap nogut, tasol long wankain taim mipela i amamas na pret tu. Bihain long 5-pela mun, mipela i kamap long biktaun Dili.
Taim mipela i muv, mipela i mas mekim ol bikpela senis long laip bilong mipela. So mipela i mas lain long nupela kalsa, nupela tokples, kaikai, na nupela sindaun bilong mipela. Taim mipela i autim tok, mipela i bungim ol man em ol i stap rabis, ol man em ol i no gat ediukesen, na ol man em ol narapela i daunim ol. Na mipela i bungim ol manmeri em ol i karim hevi long bel na tingting, na ol i gat ol bagarap long skin bikos long woa i kamap insait long kantri.a
Wok autim tok i gutpela tru! Olsem, wanpela taim mi bungim wanpela gel i gat 13 krismas, nem bilong em Mariab na em i bel hevi tru. Mama bilong em i dai sampela yia i go pinis na em i no save lukim tumas papa bilong em. Olsem planti pikinini i gat wankain krismas olsem em, em i no save em bai mekim wanem long laip bilong em. Mi tingim wanpela taim em i krai na autim bel hevi bilong em long mi. Tasol mi no save em i tok wanem bikos mi no save gut yet long tokples bilong em. Mi beten askim Jehova long helpim mi long strongim em, na mi ritim ol tok bilong Baibel bilong strongim em. Long ol yia bihain, mi lukim tok i tru i senisim pasin bilong Maria, lukluk bilong em, na laip bilong em. Em i kisim baptais na nau em i save lukautim ol Baibel stadi bilong em yet. Long nau, Maria i gat bikpela lain famili na em i pilim olsem em i stap gut insait long dispela famili.
Jehova i blesim ol wok long Timo-Leste. Planti pablisa i baptais insait long 10-pela yia i go pinis, tasol ol i mekim wok olsem ol painia, ol kongrigesen sevan, na ol elda. Ol narapela i wok long rimot trenslesen ofis na ol i tanim ol tok bilong ol buk na nius bilong Baibel. Mi amamas long harim ol i singsing long ol miting, na lukim ol i amamas, na lukim ol i kamap strong long bilip.
Mi na Alex i go long longwe teritori bilong tilim ol Memorial invatesen
NAU MI STAP AMAMAS TRU
Laip bilong mipela long Timo-Leste i narapela kain olgeta long laip bilong mipela long Australia, tasol mipela i stap amamas tru. Sampela taim mipela i save pulap insait long wanpela liklik bas na i gat ol smok-pis na ol kaikai bilong gaden em ol i kisim long maket. Sampela taim ples i hot nogut tru, na mipela i mas sindaun insait long ol liklik haus i gat ol graun floa na mekim Baibel stadi na ol kakaruk i save ron i go i kam. Maski i gat ol hatwok, mi save pilim olsem ‘Dispela em gutpela laip tru!’
Mipela i go long teritori
Taim mi tingting i go bek, mi tenkyu tru olsem papamama bilong mi i bin skulim mi long ol lo bilong Jehova na sapotim mi, na tu, ol i sapotim mi long taim mi tineja na mi no bin givim bel tumas long lotuim Jehova. Tok bilong Provep 22:6 i kamap tru long mi. Mama na papa i amamas long mitupela Alex; na ol i amamas long mitupela i mekim wok bilong Jehova. Kirap long 2016 na i kam inap long nau, mitupela Alex i mekim wok sekit long Australasia brens teritori.
Mipela i soim wanpela vidio bilong Kalep na Sofia long sampela pikinini long Timo-Leste na ol i amamas tru
Mi no bilip olsem pastaim mi tingim wok autim tok olsem wok i gat hatwok long en. Nau mi laikim tru wok autim tok. Mi luksave olsem long gutpela taim na taim nogut, yumi inap stap amamas tru taim yumi givim bel olgeta long mekim wok bilong God. Long ol dispela 18 yia we mitupela Alex i mekim wok bilong Jehova wantaim, em ol yia we mitupela i bin stap amamas tru. Nau mi lukim truim bilong tok bilong man bilong raitim song, em Devit i bin mekim long Jehova, em i tok: “Ol man i go long yu bilong yu ken i stap ples hait bilong ol, ol i ken amamas, oltaim ol bai singim song bilong amamas. . . . Ol manmeri i laikim nem bilong yu, ol bai amamas long yu.”—Sng. 5:11.
Mipela i amamas tru long stadi long Baibel wantaim ol lain i gat pasin daun!
a Kirap long 1975, woa i stap long Timo-Leste inap 20 yia samting bikos ol i laik kisim indipendens.
b Mipela i senisim nem.