Yu Save Long Dispela?

Wai na lain Israel bilong bipo i save peim braid-prais?

LONG taim bilong Baibel, lain bilong man i laik marit i save peim braid-prais i go long famili bilong meri taim famili i wanbel olsem tupela bai marit. Braid-prais ol i peim em ol samting i gat bikpela pe, ol animal, o mani. Sampela taim ol i peim braid-prais long rot bilong mekim wok, olsem Jekop i bin mekim, em i orait long mekim wok bilong papa bilong Resel inap 7-pela yia bambai em i ken maritim Resel. (Stt. 29:17, 18, 20) Wai na i gat dispela kastam bilong peim braid-prais?

Savemeri bilong Baibel, Carol Meyers i tok: “Ating braid-prais ol i givim long famili bilong meri em olsem kompensesen bilong ol wok em meri i save mekim bilong helpim famili, em bikpela samting long ol famili i save mekim wok agrikalsa.” Ating braid-prais i strongim tu pasin pren namel long tupela famili em nau marit i mekim na i olsem ol i kamap wanpela famili. Taim famili i pas gut wantaim olsem, ol inap helpim narapela narapela long taim bilong hevi. Na tu, braid-prais i kamapim klia olsem meri em engeij na em bai lusim lukaut bilong papa na go aninit long lukaut bilong man bilong em.

Pasin bilong peim braid-prais i no makim olsem meri em wanpela samting em man i ken baim o salim, nogat. Buk Ancient Israel—Its Life and Institutions, i tok: “Dispela pasin bilong givim mani o ol samting i gat bikpela pe long famili bilong meri inap mekim na long ai bilong ol man wanpela marit bilong Israel inap luk olsem ol i baim samting. Tasol i luk olsem [braid-prais] em i no pe bilong baim meri, nogat, em i olsem kompensesen ol i givim i go long famili bilong meri.”

Long nau, long sampela kantri ol manmeri i bihainim yet pasin bilong peim braid-prais. Taim ol papamama Kristen i askim long braid-prais, ol i larim “olgeta man i mas save olsem [ol] i save bihainim gutpela tingting” taim ol i no askim long bikpela mani tumas. (Fili. 4:5; 1 Kor. 10:32, 33) Long dispela rot, ol i soim olsem ol i no gat pasin bilong “laikim tumas mani,” o gridi pasin. (2 Tim. 3:2) Na tu, taim papamama Kristen i no askim long bikpela mani tumas, man i laik marit bai i no gat wok long surikim taim bilong marit bambai em i ken wok na bungim sampela mani inap long peim braid-prais. O man i laik marit i no ken pilim presa long lusim wok painia bilong em bambai em i ken wok mani fultaim long kisim inap mani long peim bikpela braid-prais tru em famili i makim.

Long sampela kantri, gavman i putim lo long sait bilong braid-prais. Long ol dispela kantri, ol papamama Kristen i mas bihainim ol dispela lo bilong gavman. Wai? Bikos Baibel i tok long olgeta Kristen “i mas aninit long ol gavman” na bihainim ol lo bilong gavman we i no pait wantaim lo bilong God.​—Rom 13:1; Apo. 5:29.