Hau Long Stadi

Kisim Sampela Save Moa Long Ol Gutpela Pasin Bilong Jehova

Taim yumi ritim Baibel, yumi ken yusim ol narapela narapela stadi tul bilong kliagut long ol tok yumi ritim. Yumi laik kisim save long ol tok i tru na kisim sampela save moa. Yumi laik kisim save long ol gutpela pasin bilong Jehova na dispela i ken strongim pasin bilong yumi long laikim em. Bilong mekim olsem, yumi ken askim yumi yet, ‘Dispela hap bilong Baibel i givim wanem skul long mi long Jehova?’

Yumi ken lukim evidens long ol gutpela pasin bilong Jehova olsem pasin laikim, savetingting, stretpela pasin, na bikpela strong. Tasol i no ol dispela pasin tasol. Jehova i gat sampela moa gutpela pasin. Olsem wanem yu ken kisim sampela save moa long ol pasin bilong em?

Lukim lista bilong winim 50 narapela ol pasin bilong Jehova i stap long Watch Tower Publications Index aninit long het tok “Jehovah” na liklik het tok “Qualities by Name.” Taim yu ritim wanpela hap bilong Baibel na yu luksave long wanpela pasin bilong Jehova, orait yu ken mekim wok painimaut long dispela pasin. (Sapos yu gat rot long lukim tasol Research Guide for Jehovah’s Witnesses, orait lukluk aninit long het tok “Jehovah God” na bihain lukim liklik het tok “Jehovah’s Qualities.”)